WILLEMSTAD.- Ayera  korte di promé instansia a dikta sentensia den e kaso di Franky’s. Ta trata di e kaso kaminda e propietario di “Franky’s chair”  Frank Ignacia di 74 aña a pèrdè su bida, despues di a keda atraká den su propio kas dia 20 di desèmber 2015, na Blue Bay Resort.  Pa ku esaki 4 ruman; Giovanni, Eddienne, Shurela  i Claudio Susanna a keda akusá, di ta esnan responsabel pa e kaso di atrako brutal aki.

Durante  tratamentu tur a ninga e akusashonnan  i a bisa ku nan no sa nada di e atrako.  E anochi ei huntu ku Frank tabatin un otro víktima. Ta trata di Hortencia ku tabata kompañá e víktima den e bibienda. El a deklará na polis ku riba e dia ei, e  ku tio Frank a sali un fiesta. Ora ku nan a yega kas, el a baha bai paden promé. Despues ku Frank a baha i yega riba stupi, el a mira un hòmber kara tapá ku maskarada di karpachi tras di Frank. El a bira su kara i mira un di dos malechor. E promé malechor a kuminsá bringa ku Frank. El a push’é benta abou

Mar’é na man i pia, tape su boka, lastr’é pone den kamber i despues huntu ku e otro a  maltrat’é. Segun Hortencia e di dos hòmber tambe a kuminsá bringa kuné maltrat’é mara su mannan i hib’é den kamber huntu ku Frank. E hòmbernan tabata bati Ignacia ku skòp den su boka i su atras. Despues nan a puntr’é pa e kluis. Segun Hortencia el a sinti kon e dos hòmbernan tabata lastra e kluis fo’i den kamber bai kuné afó. Hortencia a bisa di a rekonos’é e malechor ku a maltrat’é  na su wowo nan komo un hende ku el a bai skol kuné. Durante konfrontashon di  foto serka polis, Hortencia a rekonos’é Brian komo esun ku a agredié i tabatin kara tapá. Den un otro konfrontashon di foto, Hortencia ta rekonos’é Ettienne komo esun ku tabatin e maskarada di e karpachi bistí. Segun Hortencia, el a rekonos’é Edienne na su stèm, postura i e flèktunan bou di e maskarada. Edienne a mara Frank, miéntras Brian a mara e. Polisnan a haña den telefòn di Brian e mesun maskarada ku Hortencia a deskribí. E malechornan e anochi ei a bai ku e Jeep Cherokee di Frank. Polisnan a bin haña e SUV na altura di Skèrpènè. Despues di a tuma imágennan di kámara for di e establesimentunan ei banda, a bin mira ku e SUV di e víktima a kore pasa i su dilanti un Kia Rio blanku ku spoiler. Remarkabel tabata ku no tin hopi di e Kia nan ei ku spoiler ta kore na Kòrsou. A resultá ku Brian tabatin mes un Kia ku spoiler na mesun koló. Kolega di Edienne a deklará na polis ku e akusado a aserk’é na trabou pa bai bende algun oro pe na “pandhuis”. El a hasi esaki mas di 3 okashon. Ora  el a mira e armbant ku e nòmber Frank na djamanta, el a pensa mes ora riba e atrako i no a pant esaki. E kolega ta rekonosé tantu Brian komo Edienne riba e konfrontashon di potrèt. Pa loke ta trata e akusado Shurella Susanna korte ta konsider’é komo kómplise di e atrako mirando ku e tabata traha na porta di Blue Bay Resort.  A base di e deklarashonnan di e koleganan na porta di resort. Tambe a haña hopi plaka kèsh na euro den un kèts skondí na kas di e dama durante entrada hudisial. Giovanni ta keda

akusá komo komplasé di e atrako.

Shurella a keda kondená na un kastigu  di prisòn di 6 aña despues ku fiskal a hasi un demanda  di 10 aña di prisòn. Eddiene  a haña un kastigu di prisòn di 11 aña despues di a keda demandá na 15 aña. Pa Claudio Brian un kastigu di 11 aña i 9 luna despues ku Ministerio Públiko a pidi 15 aña prisòn. Pa Giovanni  5 aña i 9 luna di prisòn. Fiskal a hasi un petishon di 10 aña prisòn.

Hues a otorgá e otro víktima S. Hortencia, na un daño perhuisio di 5.000 florin pa e daño sikológiko ku el a sufri. E demanda pa daño perhuisio di parti di famia di defuntu Ignacia a keda rechasá pa hues.

No por konsiderá e kaso komo un asesinato, ni asesinato premeditá.