WILLEMSTAD.- E kaso di RDK ku a haña e nòmber “Lacerta” ku mester a keda presentá den oudiensia preliminar den Hof ayera, a keda posponé pa un tempu indefiní.
Esaki pa motibu ku tin petishon di parti e akusadonan pa defensa for di Hulanda, pero ainda no a haña aprobashon di Hof.
Abogadonan mr Becher i Ayoubi di Kòrsou, ta esnan ku e abogadonan di Hulanda lo bai traha konhuntamente kuné den e kaso aki.
Niun akusado ni abogado no a presentá ayera, pa motibu ku Hof a manda mail i bisa ku nan tin mester di mas tempu pa tuma e desishon i ku e kaso mester keda posponé.
E abogadonan a bai di akuerdo ku e petishon pa warda riba e desishon di Hof i tambe pa haña tempu pa prepará nan deseonan di investigashon.
E akusadonan Gilbert Cijntje, Michelle Kinburn, Ashley Isidora a keda kondená na 30 luna di prizòn i Roderick van Kwartel eks direktor di RDK na 36 luna den korte di promé instansia.
Tur a keda akusá pa korupshon na Refineria di Kòrsou (RdK).
Nan a apelá nan sentensia pa motibu ku nan no ta di akuerdo ku e kastigu ku nan a risibí.
Ministerio Públiko a demandá Cijntje, Kinburn i Isidora na 4 aña, miéntras van Kwartel a keda demandá na 5 aña mirando su posishon i ku e lo mester tabata sa mihó.
Den e veredikto hues a relatá ku e akusadonan a hasi nan mes kulpabel dor di pidi un suma grandi bou di mesa pa privilegiá un dje partnernan ku tabata interesá pa operá refineria na yanüari 2020.
Komo empleado públiko trahadó di RDK, nan a hasi mal uso di nan posishon pa asina favoresé nan propio saku finansieramente, en bes di interesnan di pais Kòrsou i su siudadanonan, segun e veredikto.
Esaki a bai a base di e kuestion di e prosedura pa yega na un partner stratégiko nobo pa e refineria ku tabatin interes di pais ku tabata di sumo importansia.
Hues ta di akuerdo ku publisidat di un skandal di soborno, ta trese daño serio na imágen di un pais ku por pone invershonistanan ku ke invertí den futuro, spanta pa hasi negoshi ku Kòrsou. Tambe e sistema kon e akusadonan a negoshá por tin influensia kompleto riba e komunidat. Hues a haña ku e echonan ku a keda probá ta asina grave, ku solamente kastigu inkondishonal ta kuadra pa ku e akusadonan.
Tur kos a kuminsá despues ku minister presidènt Eugene Rhuggenaath a hasi un denunsia na OM di posibel korupshon di e akusadonan en kuestion.
E kaso a inisiá na momento ku a kuminsá hasi investigashon dirigí riba posibel aktonan di korupshon den e proseso di negoshashon pa yega na un partner stratégiko pa Refineria di Kòrsou (RdK).
Gobièrnu di Kòrsou huntu ku e Hunta di Komisario di RdK a hasi denunsia di posibel echonan kastigabel.
E kaso a sali na kla na momentu ku abogado di gobièrnu a bati alarma ku e direktor e tempu ei van Kwartel huntu ku e tres ko akusadonan lo tabata metí den e “trayekto paralelo” pa buska un partner nobo pa refineria.
E trayekto paralelo aki tambe tabata mara na un suma di plaka di mas ku 5 mion florin.
Hof lo anunsiá un fecha nobo.

LAGA UN KOMENTARIO

Please enter your comment!
Please enter your name here