WILLEMSTAD.-Informashon ku a yega mesa di redakshon di EXTRA ta mustra kon un kompania establesé na Kòrsou, ku registrashon na Kámara di Komersio, operando for di bario Mahaai, lo a tuma un suma di plaka for di hende den eksterior ku a bai partisipá na gambling i awor no ta kontesta e persona i asta a pone restrikshon pa e sigui subi e wèpsait di e kompania.

E informashon inisial ta indiká ku dia 14 di febrüari último un persona a depositá $4200 riba kuenta di un kompania establesé na Kòrsou. Despues di esei no a permití e subi mas riba e wèpsait i na momentu ku el a opta pa usa e enk pa haña sosten el a haña splikashon ku a restringí su uso di e wèpsait pa “trade abuse”. Mas splikashon e no a haña.

Un búskeda den registro di Kámara di Komersio ta mustra ku ta trata bèrdat di un kompania establesé lokal den Mahaai i ku e kompania aki ta bou di maneho di un otro kompania/trustkantor.

Un análisis den e sektor ta mustra ku regulashon Anti Money Laundering (AML) ta duna ku e kontesta despues di e blòkia ta parse ku e kompania lo a detektá ku ta un IP lokal ta trata na gamble lokal. Den un kaso asina e sistema mes ta blòkia tur posibilidat pa partisipá na e weganan. EXTRA a kompronde ku ora tipo di keho asina drenta e Master License Holder ta tuma e kos hopi na serio i ta bai investiga mesora.