WILLEMSTAD.-Den un karta fecha awe 15 yanüari 2021 drs. Marilyn Alcala-Walle ta pidi Ministerio Públiko pa persiguí penalmente Presidente di Staten, Ana Maria Pauletta i sekretaria di Partido PAR, Kimberly Ascencion pa violashon di Lei Elektoral di Kòrsou. Manera ta konosí e miembro di Parlamento pa PAR, Jeser El Ayoubi a entrega su retiru na komienso di e siman aki. Segun Alcala-Walle, Pauletta i Ascencion a trata na lag’e kometé falsifikashon por eskrito. Ta asina ku djarason el a risibí un karta di e dos persona nan ya menshoná pa firma ku e no ta akseptá e puesto ku a kai habri den Parlamento.

Alcala-Walle ta kere ku intenshonalmente e presidente di Parlamento kier a burla di e sistema demokrátiko i tuma desishon den su propio man ken mester okupá e puesto ku a bira vakante den e kolegio di mas haltu di e pais aki. Pa kolmo a anunsiá esaki di forma habrí den medionan di komunikashon, demostrando di e forma ei ku no tin niun klase di rèspèt pa proseso demokrátiko.

E teksto den e karta ku e presidente di Parlamento a manda pa Alcalá firma ta papia di asuntunan ku niun momentu so a keda diskutí kuné i tòg a instruí Alcalá pa firma implikando ku ya kaba el a bi di akuerdo ku loke tin den e karta. Esaki ta falsifikashon i den e kuadro ei Alcalá ta denunsia e akto aki kontra di Ana Maria Pauletta presidente di PAR i tambe Kimberly Ascencion sekretario di e direktiva pa e faltamentu ku leinan di e pais aki.