WILLEMSTAD – E hóben outfielder yu di Kòrsou, Aldrich de Jongh a firma den fin di siman ku e organisashon di Liga Grandi, Los Angeles Dodgers. Manera EXTRA a informá siman pasa el a keda di ‘draft’ for di Hillsborough Community College, na Tampa pa Dodgers. Aldrich “Chaparo’ De Jongh a anunsiá e firmamentu riba su página di Instagram ku e ta hopi bendishoná pa a risibí e oportunidat aki. El a gradisí su mayornan pa semper para su tras i push’e pa logra lo máksimo. Tambe na tur su famianan i amigunan ku a sostené i tambe su frei ku semper tabata tei pe. “Danki na Dios pa duna mi e oportunidat maravioso aki.” De Jongh ya a kuminsá entrená ku e organisashon di Dodgers i pronto lo keda asigná pa e ekipo ku kual e lo bai mira akshon. Aldrich ‘Chaparo’ De Jongh ta keda representá pa e agensia,Magnus ku ta un agensia ku ta propiedat di famoso kantante puertorikeño Marc Anthony.