WILLEMSTAD.- Ayera tabata e di 28 premio di inovashon Kòrsou i alabes a habri e Curaçao Innovation Hub na Villa Maria na Scharloo. E ganadó mayó a resultá Rhiyon La Pas ku su proyekto Algae Island.

Curaçao Innovation Award ta organisá pa Citi representá entre otro pa Monique Rafaela i ku sosten di diferente partner manera MEO ku a keda representá pa Zulaika Mook.

E aña aki tin diferente inovashon i nos a tuma nota di hóbennan ku tambe a bin ku nan inovashon. Manera Zulaika Mook a bisa, Curaçao Innovation Award a bira e plataforma importante kaminda ta rekonosé inovashon i tambe teknologia. MEO ta mustra apresio na CITI pa organisá e evento aki i su kompromiso pa fortalesé inovashon.

E promé award tabata pa Business Innovation kaminda tabatin 3 nominado respektivamente Ashandra Constancia Arkene VR, Carline Marques  curaçao interactive Experience i Grace Winklaar ku Awoha. E premio a bai pa Ashandra Constancia ku Arkene VR.

E di tres tabata Digital Innovation award i e nominadonan tabata Edwin Francisca Win Wise,  Amy Pietersz i Kyara  Lucas ku Pipita i Suzette  Louw  ku OCBN. E ganadó a resultá Amy Pietersz i Kyara  Lucas ku Pipita.

E di tres tabata pa Young Innovation award. Aki tabatin dos nominado respektivamente Grace winklaar  ku Awohah i Casper Paulussen ku Doño di bo Futuro di Studio Capo Ser. E premio di inovashon a bai pa Casper Paulussen ku Doño di bo Futuro.

E di kuater tabata Sustainable Innovation award i e nominadonan tabata Rhiyon La Pas  ku Algae Island, Tafari Bakmeyer ku Queen Conch Hatchery i Casper Paulessen    Studio Capo Ser Doño di Futuro. E premio a bai pa Rhiyon la Pas ku Algae Island.

Otro premio di inovashon tabata People’s Choice Award  i esaki a bai pa Pipita.

E ganadó máksimo di Curaçao Innovation Award 2026 a bai pa Rhiyon La Pas  ku Algae Island.

Tambe tabatin diferente rekonosementu pa esnan ku a sostené e desaroyo di inovashon di Kòrsou “Future Builders”, entre nan Blue Nap Americas, Curaçao Innovation Hub, Cinex i tambe Kunukuman.

Nos por menshoná ku Curaçao Innovation Hub ta un proyekto nobo ku a kaba di habri na Villa Maria. Su vishon ta pa ta un kas pa inovashon na Kòrsou. Un kaminda ku hende, kompania i gobièrnu por traha riba futuro di nos isla.

Den su último palabra Zulaica Mook a bisa ku nan tin 28 aña  ku e rekonosementu pa inovashon aki kaminda ta mustra inovashon na Kòrsou kada aña. El a bisa ku tur aña ta un reto pa saka e mihónan i ta importante pa den inovashon wak e idea i e trabou ku ta hasi i mira e resultado. Sra Mook ta kontentu di mira e inovashonnan i nan nivel i ta hasi e eskoho difísil. E ta spera di sigui hasi e inovashonnan aki pa Kòrsou.

Monique Rafaela direktor di Citi tambe a gradesí tur ku a partisipá. I pa esun ku no a bai ku e premio e ta kere ku mester wak e echo ku el a yega leu den nominashon. Tambe el a yama danki na tur ku ta inskribí pa partisipá den e premio di inovashon. Sra Rafaela tambe a yama danki na tur partner, spònser i donashonnan ku nan ta haña pa por realisá e programa.