Algemene Rekenkamer ku krítika severo riba Relashonnan den Reino

DEN HAAG.-Kontrolaria General di Ulanda a ekspresá krítika severo riba e ministerio di relashonnan den reino. E órgano di estado a hasi su evaluashon di e relato anual di 2019 i tambe funshonamentu di e Fondo BES i tambe relashonnan den Reino. A tira un bista riba añanan anterior i e órgano a nota ku ya kaba tabatin diferente plan di rekuperashon pa e islanan ulandes den Karibe, pero tur a keda pega den e parti di implementashon.

Un di e motibunan prinsipal ku Kontrolaria General ta mustra riba dje ta e falta di kapasidat humano i tambe falta di klaridat riba repartishon di tarea. Banda di esei no tin sufisiente konosementu stratégiko tantu di parti di gobièrnu di reino komo serka e islanan. Apénas ta sigui rekomendashonnan ku sali for di investigashonnan di evaluashon. Mester di un aserkamentu totalmente diferente pa logra drechamentu di skol i kasnan na Sint Maarten di manera ku e habitantenan por enfrentá un temporada di orkan ku mas konfiansa. Mester promové kresementu ekonómiko i maneho di presupuesto kontrolá pa Aruba, Kòrsou i Sint Maarten. Suidadanonan di Sint Maarten ta bai enfrentá e di tres temporada di orkan despues ku na 2017 orkan Irma a kousa un desaster nunka bisto, anto ainda e pueblo ta warda riba e yudansa tantu sperá. Drechamentu di instalashonnan pa e habitantenan ta kana hopi poko poko. Un gran parti di e kasnan ku a keda renobá no ta stabil pa soportá otro orkan.

E konstrukshonnan di supervishon pa Aruba, Kòrsou i Sint Maarten ta poko efektivo. Segun Kontrolaria General ulandes, na òktober 2010 Ulanda a sanea gran parti di debe di Aruba, Kòrsou i Sint Maarten di manera ku e paisnan por kuminsá ku un situashon finansiero mas stabil (red. Na 2010 a sanea debe di Korsou i Sint Maarten pero no Aruba). Di tur manera a krea un sistema di supervishon finansiero pa evitá ku e paisnan ta bolbe kai den e problema di debe. Sinembargo tur e indikashonnan di Konseho di Minister di Reino no a yuda pa e paisnan hiba un maneho presupuestario ku a kondusí na situashon finansiero balansá.

 

SHARE

LEAVE A REPLY