WILLEMSTAD.- E proseso pa terminashon di Giro Bank nv ta kanando. E proseso pa terminá relashon ku trabou ku e trahadónan di Giro tambe ta kanando.

Den entrevista ku minister di finansa Kenneth Gijsbertha el a bisa EXTRA ku Giro bank komo banko tin di terminá. I p’esei nan a lanta un entidat nobo ku ta sigui atendé ku e bon i mal pagadónan i tambe lo tin di atendé ku pago di e depositantenan.

Di otro banda tin e relashon di trabou di e 100 pa 110 trahadó ku tambe tin di kaba. Tin petishon pa retiro pa tur tur trahadó i SOAW ta hasiendo e evaluashon. Mester yega na un plan sosial pa e trahadónan. Den lunanan benidero esaki lo tin di tuma lugá ora SOAW bai di akuerdo ku e petishon di retiro. Ora e trahadónan haña nan sosial plan paga i relashon ku Giro bank ta terminá.

Sinembargo segun minister Gijsbertha  e entidat nobo ku a lanta Giro Settlement Holding NV mester di personal i un sierto kantidat di esnan ku terminá ku Giro bank, lo bai den servisio di  entidat nobo te ora kaba ku tur trabou i ku e entidat nobo tambe ta disparsé.