WILLEMSTAD.- Organisashon Aliansa, ku ta kontra abusu di mucha i violensia doméstiko, ayera den un konferensia di prensa a presentá dos spòt nobo pa konsientisá pueblo di Kòrsou tokante violensia doméstiko i abusu di mucha. Segun presidente di Aliansa Jeanne Henriquez, ta importante ku mas hende ta hasi denunsia ora nan bira víktima di violensia doméstiko òf abusu di mucha. Henriquez: ‘Nos ta sumamente gradisí i yama danki na Kuerpo Polisial di Kòrsou ku nos ta bai traha huntu den e kaso.’ Henriquez a bisa ku: ‘Ora kos no ta bon, nos ta denunsiá. Pero ora kos ta bon, nos mester bisa tambe. Nos ta hopi kontentu ku awor aki pa medio di e spòt huntu nos ta bai traha huntu ku polis pa duna e víktimanan idea kuantu kamindanan nan por bai pa buska yudansa. E idea ta pa propagá pa baha e drèmpel di tal manera ku mas víktima aserká nos òf hasi denunsia na polis.’
Mas aleu Henriquez a splika ku ántes ora Aliansa a haña yamadanan di víktima di violensia doméstiko i di abusu di mucha, ‘semper nos a aserká nos partnernan manera Skuchami, Slachtofferhulp, Kinderbescherming. Pa nan por sigui traha riba e kasonan.’ Aliansa te ainda ta traha ku su partnernan. Aliansa a traha pa basta tempu pa baha e drèmpel drástikamente pa víktima por hasi denunsia. Segun Henriquez tin hopi kos ku víktimanan no sa. ‘Un di nan ta naturalmente e parti di denunsia. Hopi bia nos ta topa ku víktimanan ku ta bisa ku nan a hasi denunsia. Pero ora nos puntra pa e prueba, nan no por duna nos. Pasobra nan no sa.’
Den un di e spòtnan nobo ta splika kon por hasi un denunsia i tambe ku si un hende ta hasi denunsia e tin ku haña e prueba den su man.
Tambe Henriquez a bisa ku for di awe e spòtnan nobo lo ta na televishon, riba wèpsait i sosial media, lo kuminsá un liña di pikèt. ‘Pasobra den e spòt ta un number di telefòn ku un víktima por bèl. Nos sa ku komo konsekuensia e kantidat di trabou lo oumentá. E ora ei Aliansa a bin ku e idea pa instalá un ‘liña di pikèt’. Ku ta nifiká ku víktimanan por bèl 24/7.’ Nan lo haña un di e boluntarionan na liña. ‘Einan bo ta trese e keho òf menasa ku tin di aber ku violensia doméstiko òf abusu di mucha. I einan nos lo referí bo.’
Henriquez ta enfatisá ku ta boluntarionan ta traha na e liña di telefòn. Durante e konferensia di prensa el a gradisí nan pa nan dedikashon.