WILLEMSTAD.- Aktualmente e departamento di barak na Sentro di Detenshon i Korekshon Kòrsou ta yen ku alrededor di 70 persona indokumentá.

E grupo aki a bira asina grandi debí na dos lancha grandi ku a keda interseptá e luna aki. Manera ta konosí, resientemente un grupo di personanan indokumentá a keda deportá despues ku a logra hasi uso di un avion charter ku a bini ku personanan ku a keda repatriá.

Despues di e buelo aki hopi persona a kere ku lo por a bolbe organisá un buelo charter pa bai ku otro grupo di personanan indokumentá. Pero esaki no ta posibel ainda.

E personanan aki ainda ta enkarselá i no sa ni por duna un indikashon ki dia e grupo di persona indokumentá lo regresá nan pais.