WILLEMSTAD.- Den kuadro di Prinsjesdag, Representashon di Hulanda na Willemstad (VNW) djamars 20 di sèptèmber a organisá un aktividat pa alumnonan di Havo 4 i Vwo 5 na Kòrsou. Alrededor di 80 alumno di shete skol di havo/vwo a partisipá na e ‘Prinsjesdag Challenge’ kaminda – partí den grupo – nan a lanta un partido polítiko fiktisio i despues un plan di gobernashon pa e aña benidero. E plan mester a kumpli ku algun eksigensia. Esaki por ehèmpel mester tabata inovativo, ku atenshon pa e nesesidatnan lokal di e komunidat i mester a tene kuenta ku influensianan global, manera medio ambiente, kambio di klima, migrashon i durabilidat.


E siguiente skolnan a partisipá na e Prinsjesdag Challenge: Maria Immaculata Lyceum (MIL), Kolegio Alejandro Paula (KAP), Radulphus College (RC), International School of Curaçao (ISC), Vespucci College, Skol Avansá Integrá Humanista (SKAIH) i Abel Tasman College.
Un hurado independiente di tres persona – Representante suplente interino di Hulanda, Jonas de Graaf, periodista di Extra Oscar van Dam i èks Promé Minister di Kòrsou Eugene Rhuggenaath – a evaluá e presentashonnan i a skohe e ganadó. E premio ta bai komo donashon pa e fundashon òf asosiashon ku e alumnonan a skohe.

E alumnonan di SKAIH a gana e promé premio. E hurado a keda impreshoná ku e presentashon di e partido polítiko ‘Students of the Future’ i ta bisa ku esaki tabata ‘hopi konvisente kaminda enseñansa a fungi komo katalisadó’. Nan donashon di 3.000 florin ta bai pa Fundashon Skol Humanista na Papiamentu (FSHP). E alumnonan di Radulphus College i nan partido polítiko ‘Kòrsou pa Kòrsou’ a gana e di dos premio i nan donashon di 2.000 florin ta bai pa Green Phenix. E di tres premio a bai pa e alumnonan di KAP ku nan partido polítiko ‘Un Pais Inklusivo’. Nan donashon di 1.000 florin a bai pa e fundashon Green Kidz.

Representashon di Hulanda ta wak bèk riba un mainta plasentero i inspirativo kaminda e alumnonan a kompartí nan pensamentu riba vários tema di aktualidat.

PORTRET
…Prinsjesdag Challenge 2022. Portrèt CW Photography…

LAGA UN KOMENTARIO

Please enter your comment!
Please enter your name here