WILLEMSTAD - Durante fakansi di Pasku di Resurekshon, kuater alumno i un dosente di SKAIH Pre-Universitario (SPU) a representá Kòrsou na Moraira, Spaña, durante un Biahe di Interkambio pa Hoben: 'All for One'. E biahe interkultural akí a keda organisá pa ACD La Hoya i patrosiná pa Union Oropeo. Huntu ku Ocean of Knowledge Foundation Curaçao (OKFCW), Tim di Maneho a selektá i prepará e alumnonan (entre 13-17 aña) i dosente pa e biahe ku tabata tin komo meta pa eduká i empoderá e hobennan ku konosementu amplio di Derechonan Humano Internashonal. Esaki espesialmente en konekshon ku diferente guera ku ta tumando lugá aktualmente.

Alumnonan Rodeina Vieira Da Camara, Xiantha Molina, Jason-John Virginia, Nahayden Torregrosa i dosente Friordalysa Latina a sera konosí ku hobennan di Slovakia, Romania, Repúblika Cheko i Spaña mes. Durante e biahe, nan a eksplorá i sera konosí ku e siudat Moraira, konosé e kultura di kada un di e otro paisnan menshoná anterior, siña i interkambiá pensamentu ku e hobennan di e otro paisnan tokante Derechonan Humano i kon nan por yuda para firme pa e derechonan akí unda ku nan ta i por último, e hobennan a presentá nos dushi Kòrsou su bunitesa, kuminda, baile i kultura na e otro delegashonnan.

Awor ku nan ta bèk na Kòrsou, e hobennan lo kompartí nan eksperensia i konosementu ku demas kompañeronan di nan klas i alumnonan di skol. E biahe aki ta un ehèmpel klave di e mishon i vishon di SKAIH Pre-Universitario: un skol sekundario bilingwe ku e meta pa krea hobennan ku ta bon ankrá den nan kultura i ku alabes ta konsiente di e komunidat global ku nos pais ta forma parti di dj'e. Esaki ta netamente e motibu dikon, entre otro, SPU ta ofresé enseñansa sekundario na Papiamentu i Ingles. Rèktòr di SPU, sra. Jamie-Lee Damiana-Wyatt, ta finalisá "Nos ta hopi gradesido i orguyoso di nos alumnonan i señora Latina pa nan partisipashon na e biahe, e mayornan ku a konfia señora Latina pa kompañá e hobennan, i sin duda e organisashonnan ACD La Hoya, Ocean of Knowledge Foundation Curaçao (señor Guido Rojer) i Union Oropeo. Esaki ta e promé di hopi kolaborashon mas pa forma i enrikesé nos futuro lidernan."