WILLEMSTAD.- Temporada di aña eskolar 2020-2021 a yega na su fin. Un aña ku hopi reto. Apesar di e reto, alumnonan di grupo 8 di Blenchi-, Broeder Rigobertus i Frater Evonius school tabatin e oportunidat pa pone den práktika tur lokual nan a siña durante di aña eskolar.

Durante di e periodo di “lockdown”, e alumnonan a haña lès di kushiná, via e sistema digital. Komo nan dosente, Malcolm Helmijr a traha resetanan i vidionan di kual esakinan a wòrdu mandá pa e alumnonan. Esaki a bai masha bon mes. Tabata tin alumno i mayornan ku a manda potrèt i vidio, kon e alumnonan tabata prepará e resetanan. Hopi bon “feedback”. Kiermèn e sistema di duna lès digital tambe a hasi su entrada serka alumnonan den skol speshal. Voral esun práktiko.

Nan tabata hopi motivá apesar di e poko lèsnan di kushiná ku nan a haña. Pero tur esaki a yuda ku e preparashon pa e eksámen di práktika final di kushina.

Kada skol a repartí e “schoolverlaters” den grupo di kuater òf sinku alumno. Helmijr a sinta ku kada grupo individual i laga nan skohe huntu entre e siguiente platonan:

Lazaña, pan di konofló, salada di bèrdura

Galiña yená ku ham i keshi “Cordon Blue”, aros basmati, sous di promentòn kòrá ku krema, kombinashon di bèrdura kayente.

Nasi, galiña, krupuk, banana hasá, salada di bèrdura, chili pinda sous.

Bami, saté di galiña, kònkòmber den zür, banana hasá, chili pinda sous.

Di e forma aki, e alumnonan a siña:

Kon pa traha huntu den grupo, Dialogá i skohe huntuRespetá otro su punto di bista. Tabata un plaser pa mira kon nan tabata dialogá huntu kua kombinashon di plato nan lo bai skohe. Mi a apuntá un chèf (skohé entre nan mes) pa yuda guia e proseso. E parti aki tambe a bai hopi bon.

Kada alumno tabata tin e oportunidat pa bende e kantidat di plato ku nan ta deseá adelantá. Nan mayornan i konosínan a koperá hopi bon. Bunita ta, kon nan koleganan di klas i nan mes a koperá kumpra platonan di e otro un gruponan. Esaki ta kolegialidat den negoshi (kushina) i ta bunita ku for di aworakí nan a kuminsá pone den práktika. Nan a logra bende basta plato adelantá. Di e forma aki tambe sr Helmijr a stimulá nan ku bendementu di kuminda ta trese sèn den lachi. E entrada ta wòrdu usa pa kumpra materialnan ku kushina tin mester i tambe produktonan pa kushiná.

E alumnonan a wòrdu evaluá riba e siguiente puntonan:

Higiena

Téknika di kòrta

Téknika di kushiná

Konosementu di produkto

Konosementu di material

Komportashon.

Tur a logra pasa e eksámen ku éksito.

Komo dosente kulinario Malcolm Helmijr, tabata un plaser un biaha mas di por a aportá i pasa konosementu na kada un di e alumnonan. Dor di nan loyalidat, perseveransia, humildat i pashon, a logra e meta final pa ku kada un alumno di e tres skolnan ariba menshoná. E meta tabata pa kada alumno sinti su mes na kas den kushina. I riba nan tempu logra dominá e téknikanan importante.  Ora nan sigui ku nan estudio avansá (AGO), nan tin un avanse ku nan por sigui riba dje den kushina. Pasobra mayoria di e alumnonan a demostrá ku nan tin e abilidat pa desaroyá nan mes pa un futuro briante. Kada un di nan a wòrdu bendishoná ku un talento/arte den nan man.

P’esei mayornan i komunidat kompleto, ban sigui stimulá, motivá i demostrá nos alumnonan “spesial” ku nos tei pa nan i ku nan tin nos sosten i ayudo pa nan logra nan meta.

“Mi kier terminá ku e pensamentu aki; “Trata e alumnonan aki manera abo ke pa bo wòrdu tratá, pasobra bo no sa nunka ku den futuro serkano ku ta serka un di e alumnonan aki mes nos tin ku bai konfesá. Òf ku ta un di nan lo tin ku duna nos kuido na kama”, Malcolm Helmijr a bisa.