WILLEMSTAD.- Direktor di Rooms-Katholiek Centraal Schoolbestuur (RKCS) na Kòrsou, sra. Royla Paula-Pierre, djaluna 18 di Mart a duna un reakshon na EXTRA tokante un insidente ku a tuma lugá siman pasa na Radulphus College. Alumnonan a kontaktá diferente medio di komunikashon djaluna mainta. Den un karta nan ta bisa ku skol Radulphus no a duna niun atenshon na e alumnonan despues di un insidente ku un alumno ku a deliberadamente a bula for di edifisio di skol. Skol ta falta duna atenshon na e situashon ‘i ta solamente preokupá tokante e imágen di skol’, asina e alumnonan ta bisa den un karta. E persona òf personanan ku a skirbi e karta ta preferá pa keda anónimo i ta usa e nòmber: ‘Vox Discipulorum. EXTRA a aserká sra. Royla Paula-Pierre pa un reakshon. E ta bisa: "For di RKCS i Radulphus College nos ta biba ku nos alumnonan i nan famianan. E situashon aki tin un impakto bastante grandi riba nos komunidat i nos skol. Den e situashon aktual nos ta deseá famia tur espasio i atenshon pa nan por trata ku e situashon. Nos ta pidi tur hende pa respetá e sirkunstansianan personal i privasidat di e famia aki. For di rèspèt aki nos no ta duna mas informashon tokante e insidente aki. E tim di kuido di Radulphus College, e trahadó sosial di skol, huntu ku instansianan eksterno manera SkuchaMi, Slachtofferhulp, ARBO i IKD a duna sosten direkto na skol i na tur esnan ku ta nesesitá esaki. Den proseso nos lo brinda sostenementu personal i referensia pa profeshonalnan eksterno pa yudansa personal. For di nos kreensia nos ta pidi Dios, nos Tata, e sosten i forsa nesesario pa tur hende."
E ta enfatisá ku "pasombra muchanan/ alumnonan ta keda na e sentro di nos atenshon, nos ta tuma nan i nan famianan den protekshon". Ademas, Paula-Pierre ta bisa ku privasidat ta na promé lugá. E ta kontinuá: "Nos ta trata skolnan, alumnonan, maestronan i famianan riba un manera respetabel i profeshonal. Nos no ta buska sensashon, ku ta motibu pa nos normalmente no reakshoná publikamente di esaki."
E ta lamentá ku "asina yamá 'role models’ ta duna un opinion riba tur kos, sin tuma kontakto ku direktiva di skol i sin ku nan tin na altura kiko a sosodé i kon nos a akshoná riba esaki'."