WILLEMSTAD.- E luna aki ta luna di rekoudashon di fondo di Prinses Wilhelmina Fonds. Den e kuadro aki ayera klientenan di PWF a haña un atardi alegre na Amalia boutique Hotèl.

EXTRA a papia ku Haitham Metry kende a splika dikon el a organisá e Happy Hour ayera. No ta promé bes e ta organisá algu pa PWF. Aña pasa el a organisá un rekoudashon di fondo pa Prinses Wilhelmina Fonds i e aña aki a bai over pa algu otro.

Manera sr Metry a bisa, hopi biaha nos ta sali bai traha, nos ta rabia kunsumí i diskutí pa kosnan innesesario i ta lubidá kon frágil e hende ta. Den su kaso el a bisa ku e tin diferente persona hopi yega na dje ku a fayesé di kanser i e tin mas hende hopi pega na su kurason ku tambe tin e malesa aki.

Ayera a organisá un Happy Hour na Amalia Boutique Hotèl ku hopi ko'i kome, bebe i músika. Un atardi  pa trese alegria den hende su bida.

Haitam Metry a bisa “mi ta spera ku mi aktividat lo stimulá otro hende pa duna un man ku donashon òf aktividat alegre. Den e kaso aki e Happy Hour aki tabata pa trese legria di e klientenan di PWF”.

Sr. Metry a yama danki tambe na tur e spònsernan ku a kooperá pa e evento aki por a keda realisá.

https://youtu.be/AKv1qKu8khg