WILLEMSTAD.- Queen Making Queens Organization ta sumamente orguyoso di tin e frankisia di Teen Universe pa di dos aña konsekutivo. Un sertámen ku ta gosa di un popularidat i prestigio grandi internashonal. E aña aki, Teen Universe ta selebrá su di 14 edishon i tin mas ku 58 partisipante di diferente parti di mundu, ku ta kompetí pa e prestigioso koronanan, den tres kategoria. E sertámen lo tuma lugá di 7 pa 14 di aprel próksimo, na Repúblika Dominikana.

Ayanette Haard Statia, komo doño i direktor internashonal, ta sigui kere den nos hóbennan i tin tur konfiansa ku Amanda Verkerk lo hasi un tremendo trabou pa representá Kòrsou. Amanda Verkerk a keda skohe komo Miss Teenage Globe Curaçao 2023 i na aña 2024 a representá Kòrsou ya kaba den un sertámen internashonal.

Tur e eksperensia aki sigur, lo yuda Amanda pa profilá den e sertámen di un taya hopi mas grandi. Faltando apénas 52 dia pa e sertámen kuminsá, preparashonnan ta birando mas intensivo pa nos Amanda Verkerk.

Lèsnan papia en públiko, pasarela, orientashon i tur e preparashon di su selekshon di paña pa e sertámen ta bou di direkshon di Ayanette Statia huntu ku diseñadó nan di Kòrsou, Venezuela i Repúblika Dominikana. Tambe Amanda tin diferente produkshon di vidio i potrèt pa asina mustra e bunita kultura i historia di Kòrsou. Na yegada na Repúblika Dominikana, Amanda lo keda risibí pa un diseñadó lokal i tambe un estilista lokal profeshonal, ku lo kompañ’é durante hinter e sertámen.

Ya publikashonnan ofisial a tuma lugá i pueblo di Kòrsou por vota riba e potrèt di nos representante i tambe skibi e nòmber di Kòrsou pa mustra nos sosten na Amanda Verkerk i QMQ Organization.

E entusiasmo ta haltu i hinter e famia di QMQ Organization tin konfiansa ku Amanda Verkerk ta bai hasi un ekselente trabou pa representá nos. E sertámen final lo tuma lugá djasabra 12 di aprel 2025 i lo transmití ‘live’ via e página di youtube di Teen Universe.

Aki por mira un produkshon resien ku Amanda Verkerk a hasi ku un di su spònsernan prinsipal ku ta JSupriana Photography.