WILLEMSTAD – Kòrsou ta konfrontando momentunan difísil dor di e Vírus di Covid-19. Pa e motibu aki Fundashon Kuido di Ambulans Kòrsou (FKAK) kier a rekordá pueblo di Kòrsou lo siguiente: Yamadanan hasí na 912 mester ta yamadanan pa kasonan urgente. Si akaso ta konfrontando síntomanan paresido na Covid-19 por fabor yama dòkter di kas, konforme departamento di Salubridat i sigui instrukshonnan.

Ku mester di asistensia di Ambulans, dòkter di kas mes lo tuma kontakto ku sentral di Ambulans. Servisio di Ambulans ta konfrontando un temporada hopi drùk debí na un subida drástiko di  kasonan di Covid. Pa e motibu aki por ta posibel ku tur Ambulans ta okupá na mes un momentu.

“Nos ta pidi pueblo kompletu koperashon i sigui tur instrukshon stipulá dor di gobièrnu pa nos por baha e kontagio i salba bida di nos siudadanonan.”