ORANJESTAD - E industria turístiko na Aruba ta sigui demostrá desaroyonan positivo pa destinashon, e biaha aki for di e sektor di aviashon. Dia 8 di yüni 2019 un ruta nobo lo habri ku e American Airlines. Esaki lo konsistí di un vuelo semanal riba djasabra for di aeropuerto internacional di La Guardia na Queens,NY. E vuelo lo wòrdu realisá ku un avion tipo B737-800 ku un kapasidat di 160 stoel.

Pa Aruba, esaki ta nifiká un potensial pa kresementu adishonal den turista nan merikano a traves di diferente konekshon via Merka.

Na Aruba, American Airlines aktualmente ta operando ku vuelonan diario for di Miami, FL – Philadelpia, PA – Charlotte, NC. Den aña 2018 e aerolínea a trese un total di 170,338 pasahero. Aktualmente e aerolínea ta number 2 den e merkado merikano kubriendo 17 porshento.

E American Airlines ta un sosio importante pa turismo di Aruba i ta operando ya desde aña 1971. Aruba su relashon estrecho ku American Airlines ta sigui hisa kalidat di nan turismo i sigui fortifiká e ruta nan eksistente ku Aruba tin ku e aerolínea pa mas di 48 aña kaba.