WILLEMSTAD. – American a anunsiá ku desde promé di yüni 2018 e kompania di aviashon lo no tuma sèn kèsh mas na Aeropuerto Internashonal di Kòrsou. Pasaheronan lo bai tin ku usa tarheta di krédito o tarheta di debito pa hasi kualke transakshonnan na e aeropuerto, inkluyendo kumpra pasashi i paga pa maleta.

“American a hasi e traspaso pa un ambiente sin sèn kèsh na vários aeropuerto rònt mundu, kual ta permití e trahadónan pa asistí klientenan na un manera mas rápido i mas efektivo,” Nelson Cortes, American su Gerente General pa Aruba i Kòrsou, a bisa. “Kitando for di transakshonnan efektivo tambe ta redusí e kompleksidat di trabou pa e agentenan kende lo no tin ku preokupá mas pa atendé ku sèn kèsh, konta i duna sèn bèk o sera kaha na final di dia. Esaki ta un notisia positivo pa klientenan i pa e trahadónan na e aeropuerto.”

American aktualmente ta ofresé biahenan nònstòp pa Kòrsou for di su hubnan na  Aeropuerto Internashonal di Miami (MIA) i Aeropuerto Internashonal di Charlotte (CLT), operando dos biahe diario for di MIA i dos biaha pa siman for di CLT.

E Grupo American Airlines i American Eagle ta ofresé un promedio di kasi 6.700 buelo pa dia pa kasi 350 destinashon den mas ku 50 pais. American tin hubnan na  Charlotte, Chicago, Dallas/Fort Worth, Los Angeles, Miami, New York, Philadelphia, Phoenix, i Washington, D.C.

American ta un miembro fundador di e aliansa ‘one world’, kende su miembronan ta sirbi mas ku 1.000 destinashon ku mas o ménos 14.250 buelonan diario pa 150 pais.   Komersio di akshonnan di American Airlines Group Inc. ta transkurí riba e bolsa Nasdaq bou di e símbolo AAL.

Na 2015, su akshon a djòin e índise S&P 500. Konektá ku American riba Twitter @AmericanAir i na Facebook.com/AmericanAirlines.