WILLEMSTAD.- Organisashon pa derechonan humano, Amnesty International ta hopi kontentu ku e veredikto di Korte Superior na Kòrsou di djárason 30 di yüli. Asina Amnesty ta bisa djamars 5 di ougùstùs den un reakshon pa Extra.

Manera ta konosí Korte Superior ta dikta ku no tin base pa detené hende solamente pa e echo ku nan a yega Kòrsou di forma ilegal. E tribunal di Korte Superior mester a evaluá un veredikto di Korte den Promé Instansia, despues ku wes a duna algun venezolano rason den nan opheshon, oponiendo kontra di nan detenshon komo personanan indokumentá.

Segun Amnesty e veredikto di Korte ta hopi bon notisia pa migrantenan ku no ta drenta Kòrsou na un manera ‘regular’, por ehèmpel pasobra nan a hui for di nan pais. Amnesty ta splika ku te ainda Kòrsou semper ta sera migrantenan asina. “Amnesty International a publiká diferente rapòrt tokante situashon di Venezolanonan riba e isla. A hasi esaki na añanan 2018, 2021 i 2023. Semper Amnesty a pidi atenshon pa situashon ku Kòrsou ta violá derechi di hende.”

“Desishon di Korte ta un paso positivo i ta duna hopi di speransa. Amnesty ta spera ku Kòrsou lo kumpli mihó ku derechonan humano internashonal di hendenan ku ta buska protekshon na Kòrsou.”