Balansa Grupo MCB a pasa marka di 8 mil mion

WILLEMSTAD.-Maduro & Curiel’s Bank (MCB) konosí den nos komunidat komo Banko Maduro a presentá nan relato anual pa loke ta trata 2020. Di e forma aki e banko ta kumpli, hopi tempran, ku reglanan ku ta konta pa institutonan finansiero di presentá nan sifranan ofisial i oudita, na publiko.

Grupo MCB ta konsistí di 15 kompania ku ta desplegá aktividatnan lokal i internashonal na tur seis isla ku ántes tabata Antia Hulandes. E sifranan den e resúmen finansiero ta konforme normanan di International Financial Reporting Standards (IFRS).

Aña 2020 tabata un Aña difísil pa hopi sektor teniendo kuenta ku esei ta e Aña ku Covid a drenta Kòrsou. MCB den su relato ta mustra ku na 2020 nan a eksperensia e benefisionan di un balansa fuerte pasobra esei a pone ku nan por a resistí diferente kambionan den hasimentu di negoshi. Na 2016 e balansa total di Grupo MCB a surpasá e marka di 7 mil mion florin i na 2020 e grupo a pasa e marka di 8 mil mion florin. Esei ta despues di un redukshon chikitu na 2019.

E aktivonan total a alkansá 8.254 mion florin, esaki ta danki na kresementu di depósito di klientenan. E depósitonan di kliente a pasa e marka di 7 mil mion florin pa promé bia, kresiendo ku 6% ku ta igual na 404 mion florin. Esei ta resultado di konfiansa ku e banko a risibi di klientenan korporativo, partikular i publiko.

E parti di préstamo i adelanto na kliente a oumentá di forma masha moderá ku 49 mion florin (1%) pa 4.3 mil mion florin. E kresementu aki a bini parsialmente di e moratorio di pago bek ku e grupo a fasilitá klientenan komersial i partikular durante di 3 luna pa aliviá nan kaida di entrada.