E pelotero ta relatá momentonan difísil pa su persona aña pasá 

WILLEMSTAD.- Den un deklarashon ku el a saka ayera, Andrelton Simmons a splika e di kon na sèptèmber último el a opta pa no hunga e siman final di MLB. E pelotero yu di Kòrsou a sufri di depreshon i te hasta sentimentu di suisidio, ku ta algu ku a persiguié for di tempu e tabata un hóben.
“Tabata un situashon fèrfelu ora ku e sentimentu di suisidio a krusa den mi mente”, segun Simmons a skirbi. “Ta algu ku ma hura hopi tempu pasá ku lo mi no bolbe konsiderá. “Mi tabatin suerte di por a papia ku un terapista, kende a yuda mi. “E idea pa finalisá temporada den un ‘bubble’ tabata di mas pa mi”. Simmons a skirbi ku e pensamentunan di suisidio nunka a bira un akshon.
Simmons a ekspresá su sentimentu skirbiendo esaki. El a splika ku e ta sinti mas konfortabel pa skirbi en bes di hasi esei di forma verbal.
Djadumingu último Twins tabatin un ‘Zoom call’ pa introdusí Simmons. Durante dje seshon, ku tabata e promé biaha ku el a papia ku media for di despues di a stòp faltando un siman pa temporada 2020 kaba, el a nenga na duna motibu di esei. Pero dos dia despues el a tuma kontakto ku un reportero i a bisa ku a yega e momento pa e konta e loke el a pasa aden.
“Na e momento aki mirando kuantu hende ta bringa ku depreshon, ansiedat i suisidio ma sinti ku ta momento pa konta un parti di mi historia. “Mi tabatin miedu ku hendenan lo husga mi i malinterpretá mi”.
Simmons a bira e último di un grupo di atletanan di nivel haltu ku ta bai den publisidat papiando di depreshon, manera Dak Pescott (Dallas Cowboys), Kevin Love (Cleveland Cavaliers) i e landadó Michael Phelps.
“Hopi hende ta pasa den momentonan di strès”, Simmons a skirbi. “Pa diferente rason. Mi sa ku tin e temor pa buska yudansa pa motibu dje persepshon di hende ku ta kere ku lo tin algu robes ku bo, siendo ku e sentimentu ei por bin pa diferente motibu: miedu, pèrdida, trauma, problema ku esun ku bo ta stima. Bo no ta bo so, bo no mester tene tur kos den bo. Buska un hende ku por yuda bo pa ekspresá bo emoshon na un manera liber”.
Segun dr .John Ogrodniczuk, direktor di un programa di psikoterapia di University of British Columbia, na momento ku hendenan manera Simmons konta nan historia, mas esei ta kontribuí pa otronan buska i haña yudansa. “Sea korekto òf no, ta mira nan komo role models i nan tin un plataforma públiko ku otronan no tin. Loke nan ta bisa, loke nan ta hasi por tin efekto riba públiko en general”.
Durante e lunanan di komienso di COVID na Merka Simmons a hunga beisbòl, pero e no por a kita su mente for di loke ta pasa den mundu pafó dje ambiente di beisbòl. “E promé biaha tabata ora mi tabata tras di stür na Oakland i ta pasa mira komèrsio i restorantnan purbando pa keda habrí ku hendenan sin kas pafó dje lugánan. “E kos ei a dal mi realmente duru”. Simmons a sigui bisa ku el a kuminsá papia ku un terapista pa yud’e den su sentimentu, pero tur kos a bira di mas pa su persona.
Finalmente el a skohe pa no hunga e delaster siman di temporada regular di MLB. Mayoria hende tabata sorprendé pa su desishon. E notisia a surgi na momento ku Angels tabata drentando ‘bubble’ pa e último siman di temporada, pasobra matemátikamente nan tabata na bida pa postseason.
“Mi tabata hopi tristu tendiendo di kantidat di morto i mira kon negoshinan tabata sera. Mi tabata sinti malu kon tur e reglanan nobo i miedu tabata afektá hendenan”, el a skirbi.
Simmons: “Tin muchu mas kos ku a tuma lugá, pero mi no ta kere ku mester papia tur kos pa otronan husga mi. Mi no tabata habrí ku e kos aki pasobra mi no ta gusta e idea di splika kada detaye di mi bida”.
Simmons a skirbi di a kambia su pensamentu ora ku el a realisá ku e por yuda otronan ku a bin ta ‘struggle’ mental i emoshonalmente.
“Mi tabatin miedu ku hendenan lo a husga mi i kambia mi vershon.”Tin hende ku lo no gusta ku mi ta trese e kos aki dilanti i otronan lo por bin husga kiko ta bon pa mi salú en general. “Mi ta oké pa kompartí e kos aki pasobra awor mi sa ku e perspektiva i husgamentu di hende lo tin mas di aber ku nan mes i no ku mi persona”.