WILLEMSTAD.- Hushang Ansary, aki na Kòrsou konosí komo e gerente i doño dje kompanianan Ennia i Banco di Caribe, ta ser konsiderá komo kabesante di un dje famianan korupto prosedente di Iran i establesé na Merka. Den transkurso di ayera a sali un reportahe interesante di Shirsho Dasgupta ku ta duna un bista kla kon Ansary su moveshonnan ta. E ta ser konsiderá komo un dje multimionarionan ku ta skonde nan propiedatnan i plakanan unda tin paraisonan fiskal, pero tambe ta splika di su bon kontaktonan den e nivelnan di mas haltu di gobièrnu Merikano. Si nos splika bo ku e tabata un dje finansiadónan dje inougurashon dje presidensia di Donald Trump, anto lo bo komprondé di kiko nos ke men.

Den e artíkulo, por sierto basta ekstenso, ta splika ku Ansary komo un bionario a biba semper a base dje poder di plaka. Un tempu e tabata miembro dje sírkulo nukleo di Shah di Iran, pero despues el a move pa Merka unda el a kuminsá ku un kompania di petroli na Texas, pa seguidamente e bira un dje finansiadónan importante di Partido Republikano.

Ansary i su kasá Shahla:

Den e reportahe aki ta dediká basta atenshon na su konekshon ku e kompania di seguro Ennia Caribe na Kòrsou. Na 2006 Ansary a optené e kompania aki pero ku tempu a bin us’é komo un “piggy bank”. El a lanta un kompania na Luxemburg i transferí fondonan di Ennia pa skapa di impuesto.

Pero promé ku e lo por a saka tur plaka for di e kompania Banko Sentral a kai aden i a tuma kontròl dje empresa. Tin plakanan di prima pa seguronan di bida i di malesa ku tabata ser pagá dor di klientenan a ser usá despues pa hasi donashon na Presidente George W. Bush i èks Sekretario di Estado James Baker.

E denunsia aki ku a sali di e atministrador nobo di Ennia, ta pidi pa tene no solamente Ansary pero tambe su yu muhé Nina, i tres otro asosiado (Abdallah Andraous, Ralph Palm i Gijsbert van Doorn) responsabel pa e dañonan ku ta kalkulá na algun shen mion florin.

ENNIA KOMO ATM:

Ta hopi plaka a ser saká dor di Ennia pa tur sorto di gastu. Djis pa menshoná algun: Ansary tabata paga pa uso di jetnan privá ($15 mion); i kubri gastunan eksesivo; Un $3.4 mion a ser gastá entre 2006-2017 pa konseheronan ku no tabatin relashon ku Ennia; $6 mion na pago salarial pa hendenan ku no tabata traha pa Ennia; $8 mion pa paga amigunan den periodo di 2009-2018.

Despues ku Ansary a saka komo $100 mion for di Ennia i transferí esaki pa e kompania Parman International, i tambe $150 mion mas na kaminda.

Banko Sentral a buska pa rekobrá $240 mion di dje na Merka; Ansary a trata di blòkia esaki pero korte Merikano a disidí na fabor di Banko Sentral. Ansary lo a duna un $50 mion mas, aunke esaki a bini di un kuenta privá.