Vladimir Victorina di Partido Pueblo Soberano:

WILLEMSTAD.- E ròl di mentor ta igual ku e ròl di un mayor, esaki ta loke ku Vladimir Victorina ku ta un di e kandidatonan riba lista di Partido Pueblo Soberano (PS) a bisa djasabra tras di lomba durante nan programa radial semanal. Victorina a bisa ku si ántes tabatin 20% di e muchanan tin problema, awor aki ta entre di 60 pa 80% di muchanan den klas tin problema serio na kas.

‘Ora bo ta mentor bo tin un ròl di tata, pero ta yega un kaminda ku e ròl di tata ta para, pa motibu ku bo no tin e outoridat total. Tin kos ku mester pasa nan over pa kordinadó i si ta kos mas serio ta yama e mayor pa sinta atendé ku e problema’, Vladimir Victorina den su bida diario ta traha komo dosente a splika.

E klasnan di mas abou ta 25 pa 30 mucha i hopi mayor no ta realisá ku nan ku tin un òf dos yu ku nan tin di dil kuné, miéntras e mentor tin un klas di 25 mucha mínimo di kua kada un ta un yu. E mentor tin di dil ku tur e muchanan aki ku nan problemanan sosial emoshonal, siendo hopi mentor tin nan mes yunan na kas.

Lamentablemente hopi mayor no ta konsiderá esaki i no ta traha huntu ku e mentor òf no ta riba e mesun linia ku e mentor i esaki ta hasi e trabou di mentor ta difísil. Por ehèmpel, si un bisa no i e otro ta indiká ku e tin di bai pens’é,   no ta bon pa e yu su salú mental. Banda di esei na hopi okashon e ròl di wela i tanchi ta di influensia basta grandi.

Victorina a splika ku ser un mentor ta un tarea èkstra banda di duna e lès. Esaki ta tuma hopi tempu di mentor, pa motibu ku mester dediká hopi tempu na e mucha su desaroyo pa e por pasa su aña eskolar ku éksito.

E loke ku ta hasi e trabou di un mentor difísil, ta ora ku e mayornan no ta riba e mesun linia. Un di e problemanan ta ku tin mayor ku ta kere nan yu i esaki tambe ta hasi e trabou di un mentor difísil.

Un otro situashon ku PS a premirá, ta e problema sosial ku ta surgi dor ku hopi hende nan situashon sosial a deteriorá.

Awor ku refineria a sera i ku efektonan di COVID a pone hopi famia sin trabou òf mayornan ku a bira víktima di kriminalidat dor ku e situashon ku komunidat ta pasando aden, ta remarkabel ku hopi di e muchanan aki sintá den klas. Si ántes tabata 20% di e muchanan tin problema, awor aki ta entre di 60 pa 80% di muchanan den klas tin problema serio na kas.

Hopi biaha un mentor, no por haña un bon bista kiko ta e problema di e muchanan, pa motibu ku e mentor ta topa ku su muchanan tres pa kuater ora so den siman.

Esaki por krea un situashon fèrfelu dor ku e mentor no por señalá lihé kiko ta e problemanan ku tin na kas.

Finalmente Victorina a enfatisá, ser un mentor ta un trabou interesante, pero na mes momentu e ta algu hopi pisá  i prinsipalmente si e mentor no tin tur e apoyo di mayónan i apoyo di e skol.