Anthony Haile ta hopi fortuna di ta gusta biaha. A yega momentu ku e no ta ni kòrda mas unda ku unda el a bai. E ta kòrda mas di 15 aña pasa el a bai China. E ta miembro di Kiwanis Curacao i nan a bai Taipei Chines. E tempu ei sin Facebook i sin kámara , el a biaha keiru i hasi hopi pero awor e no ta ni kòrda e lugá mas. Si bo dokumentá loke bo a eksperensia i ora e ta grandi e tin kos pa mustra su nietunan unda el a bai dor di mustra esaki asta den korant. Anthony a yega di bai Egipto kaminda el a bai sambuyá den Rode Zee. El a topa hopi lugá bunita pa saka potrèt i e ta haña masha bunita pa pone su potrèt i relatonan, no pa hasi buya pero pa kompartí ku otro hende loke e ta eksperensiando. Asina el a kuminsá skibi i a kai den masha bon tera serka EXTRA ku te e momentu ei no tabatin relato di biahenan. Anthony ta kòrda Perú, Dubai, Sürnam i awor e ta skibi di su biahe krusero. “Hopi hende ku ta lesa e historianan aki ta pendiente i ta reklamá ora e kos no Sali den korant”.

Anthony ta konta ku e no por bisa spesífikamente si ta Nort, Sùit òf unda e ta gusta mas pasobra kada un tin su kos apart kuné. Ora bai Amérika Latina ta diferente ku por ehèmpel Alaska òf Canada. Tin kosnan ku tin di paga tinu ku por ehèmpel na Oropa no tin. E ta kòrda su bishita na Berlin/Alemania. E no tabata konosé Alemania. E mentalidat aleman ta otro for di esun ulandes i esun franses. E dushi ta ku ora wak e artíkulo bek e ta trese aun mas dushi rekuerdo. I p’esei ta un lástima ku tempu el a bai China e no tabata asina bon ekipá pa dokumentá su mes.

Ora di biaha su kámara, un bon dùikbrel i bai ku ménos paña posibel.Si bo bai ku hopi kos no ta sobra lugá pa pone e kosnan ku bo ta haña interesante afó. Den kaso di kámara no mester ta algu super luhoso pero si algu pa por dokumentá. I asta ku telefòn por saka potrèt. Awendia tur telefòn tin kaminda pa hasi anotashon loke sigur a yud’e pa e momentu ku e ta skibi.

Promé ku su biahe e ta buska informashon di unda e ta bai. Por hasi dos kos, buk un biahe ku tur kos òf algu ku bo mes ta hasi. Por ehèmpel Alemania ta un pais masha bon regulá i no ta trese sorpresa kuné. For di Ulanda nan a skohe unda nan ke bai i delantá a reserva nan biahe. Anthony ta gusta bai ku e busnan Hop on Hop off pasobra bo ta konosé muchu mas lihé den poko dia. Pero delantá ya e sa unda e bus ta pasa pa e sa unda e ta biaha. Ora ta bai lugá un poko problemátiko ta bon pa bai ku un tour òf algu bon organisá i den grupo.

Importante ora ta bai hasi biahe pa tene kuenta; awendia tin asina tantu posibilidat riba e sistemanan moderno ku informashon ta fásil aksesibel. Si ta Argentina kuminsá buska informashon di unda pa bai, kua ta e 10 lunanan mas rekomendabel pa bishita.. Anthony ta pidi tur hende pa wak si tin un Hop on Hop off ku hopi biaha no ta karu i bo mes ta disidí unda pa baha.

Biahando riba un krusero  dor di Amérika Latina

Durante di último lunanan aki ku regularidat mi ta skibi riba temanan di biahe pa Korant Extra den e edishon di djasabra. Ta bon pa mi pone aserka ku e meta di e artíkulonan aki ta pa kompartí ku e lesadó mi impreshon  di e pais ku mi a bishita i kisas trese rekuerdo pa e persona ku tambe a bishita e pais aki òf lanta e interes serka e lesadó pa e tambe bishita e pais aki. Lesando e artíkulo e ta haña un “voorproefje” di lokual ta ward’e.

E reakshon nan ku mi ta haña ta hopi positivo ku ta duna mi ánimo pa mi sigui kompartí ku e lesadó di Extra e artíkulonan aki maske tin biaha ta biahe nan ku nos a hasi algun tempu pasa pero ku te ainda tin nan balides pa lokual ta e lugá i lokual bo por topa den e pais.

Semper ami ku mi kasa Ingrid tabata kier a hasi un krusero pa Amérika Latina pero nunka e oportunidat pa hasi esaki no tabata presente. Despues ku nos tur dos a baha ku penshun, nos a disidí dos aña pasa, na febrüari 2016,  pa hasi esaki i asina kumpli ku un di e deseonan ku nos tin riba nos lista. Hasiendo e krusero aki nos tabata tin e oportunidat di konosé durante di dos siman, Chile, Uruguay i Argentina. Islas Malvinas tambe tabata para riba e lista pero esaki no a konkretisá pa motibunan ku despues lo mi bini bek riba dje. Den un serie di 7 artíkulo lo mi para ketu na e diferente lugánan ku nos a bishita i asina kompartí nos impreshon ku boso lesadó di Extra. Den e promé artíkulo aki nos lo para ketu na Santiago de Chile.

Nos mes a hinka nos cruise den otro i a skohe   Norwegian Sun pa hasi e krusero saliendo for di Chile, pasando bastante porta di Chile, sigui bai abou pasa krusa na e punto final di Sur Amérika, sigui pa Malvinas despues pa Uruguay i terminá na Argentina.

Un di e motibunan ku tambe nos a skohe konsientemente pa e Barku Norwegian Sun ta ku Norwegian Cruiselines  ta propagá e konsepto di “freestyle cruising” i nos kier a eksperimentá kon esaki ta presis. Na final di e di 7 artíkulo nos lo kompartí ku boso nos opinion di e konsepto aki.

Biahe pa Chile

Despues di un biahe di kasi 9 ora nos a yega riba un djaweps mainta pa 6 or na Santiago de Chile. Danki Dios nos a pidi e hotèl kaminda nos a keda pa laga un taksi bin buska nos. Esaki tabata para na airport kla ku nos nòmber riba un bòrchi ora nos a Sali for di e parti di yegada lokual riba su mes tabata algu hopi agradabel ya bo no tabata tin e problema pa buska un taksi e ora mainta tempran ei.  Ademas e taksi di hotèl sa presis kon e tin ku kore pa yega na e hotèl. Komo nos tabata tin solamente 2 dia na Chile nos a palabra ku e konduktor di e  taksi ku e siguiente dia e ta buska nos pa nos hasi henter un dia un sight seeing tour dor di Santiago de Chile i asina konosé e partinan mas importante di e siudat grandi aki. Den esaki tabata inkluí tambe un bishita na un plantashon di biña. Tambe nos a palabra ku e taksi  pa e buska nos i hiba nos Valparaíso kaminda nos lo a subi e barku pa kuminsá nos krusero.  Pa un preis aseptabel esaki tabata ningun problema pa regla.

Santiago de Chile

Chile ta un pais di mas o ménos 17 mion habitante di kual 6 ½ mion ta biba den Santiago de Chile kual ta kapital di Chile. Chile a biba algun aña bou di un régimen militar despues ku Presidente Allende kende a wòrdu skohé demokrátikamente a wòrdu asesiná dor di General Pinochet i a tuma mando over di e pais. Na e momentu nan aki  Sebastian Piñera ta e Presidente nobo di Chile i dia 18 di mart último e a sinta ofisial komo Presidente. E tabata presidente kaba di 2010 te ku 2014. Sra Michelle Bachet a siguié komo Presidente pero den e último elekshon Piñera a bolbe gana e elekshon ku 54% i a bolbe bek na poder.

E impreshon general di Chile ta ku e pais aki ta unu próspero ku un infrastruktura bon regla. E régimen di Pinochet a trese hopi renovashon na benefisio di e poblashon. Debí ku nos estadia na Santiago tabata hopi kòrtiku nos a palabra ku e shofùr di taksi ku nos lo a bishita e siguiente lugánan: Sky Costanera, Plaza Santa Lucia, Seru San Cristobal ku tin un Virgen riba dje, Plaza de la Moneda, E kaya di London/Paris i komo último un bishita na un plantadó ku ta kultivá biña Concho y Toro.

Sky Costanera

Santiago,  tin manera tur siudat grandi,  diferente sentro komersial ku ta ofresé masha hopi produkto. Un di e sentro komersial nan aki ku ta den sentro di siudat,  ta Costanera Center ku ta den un edifisio di mas di 60 piso. E sentro komersial ta situá den  e promé 5 pisonan i e otro pisonan ta mas tantu ofisina òf  kantor di diferente empresa. Te ariba na e piso mas altu bo tin un bunita miradó  kaminda bo ta haña un bista kompleto  di henter Santiago de Chile. Pa bo por yega e Miradó aki bo ta drenta den un left ku ta hibá bo na piso nr. 60 den 40 sekònde.  E  miradó ta e lugá ideal pa bo saka bunita potrèt di henter Santiago ya ku e bista ta úniko. Natural bo tin ku kumpra un karchi pa bo subi,  ku ta kosta bo 5000 peso chileno ku ta mas o ménos igual na 8 dòler. Pero kere mi ku e bista ku bo ta haña ta bale la pena e 8 dòler aki.

Plaza Santa Lucia

Plaza Santa Lucia tambe ta un di e lugánan ku ta bale la pena bishita. E ta situá riba un parti altu di un seru for di kual bo tin un bunita bista di e siudat. E ta un lugá kaminda hopi pareha spesial den fin di siman ta bini pa pasa un ratu agradabel ku otro. Den pasado e lugá aki tabata di balor stratégiko ya ku di aki bo por tabata tin un bista hopi bon ora ku enemigu tabata aserka. Den pasado e  plasa aki tabata yama Seru Huellem, nòmber di un luchadó indjan hopi konosí na Chile. Su estatua ta para te ainda altu riba e seru den e plasa.

Seru San Cristobal

Seru San Cristobal tambe ta riba un seru altu ku un bunita bista riba e siudat. Te ariba riba e seru e chilenonan a pone un bunita imágen di Mama Maria ku ta mira riba e siudat. Meskos ku Ecuador i Brasil Santiago de Chile tambe tin su estatua di un Santu ku tin ku sòru pa e bienestar di e siudat. Remarkabel ta ku huntu ku e estatua di Mama Maria tambe tin un estatua grandi di Papa Juan Pablo 2. Ta parse ku e Papa aki ta hopi stima na Chile.

Banda di e estatua tambe tin algun piedra grandi ku ta kontené shinishi di hendenan ku a wòrdu krema i ku famia a kumpra un di e piedranan pa warda e shinishi den dje. Interesante. Henter e lugá de facto por wòrdu konsiderá komo un Santana ku shinishi di hendenan ku a muri. Ainda e lugá no tin hopi tienda ku ta bende souvenir pero solamente un tienda ku ta bende algun rosario.

Ta parse ku e hendenan no a diskubrí ainda e potensial ku e lugá aki por tin pa hasi negoshi pero lo no straña mi ku aki algun aña lo bin diferente tienda ku ta bende kos religioso. Tambe tin un kapèl riba e tereno i 7 krus hopi grandi ku ta ekspresá  diferente figura di Kristu. Mester pone aserka ku e pintornan a usa nan imaginashon hopi bon pa pinta e diferente figura di Kristu.

Plaza de la Moneda

Despues di bishita Seru San Cristobal nos a sigui pa Plaza de la moneda ku ta wòrdu konsiderá komo e kurason di gobièrnu di Chile. E edifisio aki tin un historia pekuliar.  Den tempu ku tantu Chile komo Brasil tabata tin mester di un edifisio di gobièrnu nan a laga traha un diseño na Inglatera. Dor di un kibukashon e diseño di Chile a bai Brasil i esun di Brasil a bini Chile. Ta pa e motibu ei e edifisio di gobièrnu di Chile de facto ta un diseño di Brasil. Banda di La Moneda bo tin tambe un Sentro kultural pa artista i amante di kultura. Komo ku e kaminda pa bai Plasa de Armas tabata sera relashoná ku algun trabou riba e kaminda nos mester a sigui sin por a bishita e parti aki ku sigur ta unu masha importante.

Choncha y Toro

E último lugá ku nos a bishita tabata e kultivo di Biña ku yama Choncha y Toro. Por sierto un biña mundial mente konosí den i pafó di Chile. No solamente e biña aki ta konosí pero ta wòrdu konsiderá komo un di e mihó biña nan na mundu. Ta pa e motibu ei una bes na Chile nos a probechá pa bai bishita e lugá kaminda e biña aki ta wòrdu traha i mira di aserka kon e proseso ta tuma lugá.

E tur na e fabriká di Choncha  y Toro ta dura un ora i bo ta haña e oportunidat pa despues purba dos tipo di biña i tambe bo ta haña un glas komo rekuerdo di bo bishita. Bo por purba mas biña si bo ke pero pa hasi esaki bo tin ku paga algu èkstra.  Nos por a mira tambe kon e proseso di traha e biña ta tuma lugá i kon di e dreifinan e biña ta wòrdu traha. Hopi interesante mes.

Un di e biña nan mas konosí di Choncha y Toro ta Casillero del Diablo. E guia ta konta nos ku e nòmber di e biña aki tin di aber ku den pasado algun hende a purba di hòrta den e bodega e biñanan ku tabata den e kèlder pero nan no por a hasi esaki ya ku ora nan tabata bai hòrta e kahanan di biña algun “diabel” a paresé nan dilanti ku nan a spanta kore limpi bai. Ta p’esei te dia di awe e tipo di biña ku nan kier a bai hòrta yama Casillero del Diablo.

General Pinochet.

Ta imposibel pa bo bishita Chile sin tende di e nòmber Pinochet. Apesar di e demokrasia ku Chile konosé awendia, e rekuerdonan di General Pinochet ainda ta bibu den hopi Chileno su mente. Durante di e periodo ku e tabata presidente bou di e régimen militar e a goberná Chile ku man di heru i a sòru di hinka miedu i sustu den e pueblo di Chile pa asina dominá nan i hasi ku difísilmente nan lo a bai protesta. Ningun hende no tabata tribi di papia algu malu di e hunta militar.

General Pinochet tabata tin un grupo di general retirá ku a forma un grupo ku yama DINA i ku tabata sigui delaster moveshon di pueblo. Kaminda tabata nesesario nan tabata arestá e hendenan ku tabata tribi di protesta i hopi biaha bo no tabata tende nunka mas nada mas di nan.  Nan tabata wòrdu asesiná kruelmente òf tortura pa asina duna e pueblo un ehèmpel kiko por pasa ku nan si nan tribi di protesta òf plama notisia kontra di e régimen militar. Hopi kruel General Pinochet i su grupo di militar sadista tabata.

Pinochet tabata asina konvensí  ku nada no por a pas’e ku mei mei den siudat di Santiago e a laga traha un kas di tortura kaminda mas di 100 hende a wòrdu tortura i mata durante di su régimen. Tur e hendenan aki tabata personanan ku no tabata di akuerdo ku e régimen di Pinochet i nan tabata wòrdu kohe prezu i tortura. E kas di tortura aki ta keda den e kaya yama “London/Paris” i te dia di awe ta un prueba bibu di e horibel práktika di general Pinochet.

Hasta Iglesia Katóliko tabata wòrdu pone bou di preshon ku nan no tabata tribi di protesta òf halsa nan bos pa miedu ku esaki lo tabata tin konsekuensia pa e obispunan i padernan. Esaki a pone ku Pinochet tabata tin man liber i tabata hasi i deshasí manera e tabata kier. Ta wòrdu bisa ku Pinochet a duna Inglatera hopi informashon stratégiko ku a pone ku sin problema e Inglesnan por a gana e guera di Malvinas. Pero over di esaki den un proksimá edishon ora nos ta papia over di Malvinas.

Pa komentario: anthonyhaile@yahoo.com/ 512 6220