WILLEMSTAD.- Korte a posponé kaso di e hòmber J. Lopez (31) akusá pa 5 echo kastigabel. Segun e promé akusashon dia 28 di yüni 2021, Lopez a bai ku telefòn di e víktima di fam Martina.

Lopez ta dal Martina riba e mesun fecha ku un vehíkulo den su lomba, ku e konsekuensia ku e víktima a a kai riba su kara i pèrdè gran parti di su djentenan. Despues di su akto, e akusado a kore limpi bai.

Riba 1e di yüli 2021, Lopez a menasá e víktima di fam Rademaker bisando "mi ta bin i basha bala riba bo, hopi bala". Despues el a dal e ku moketa den su kabes i rònt su kurpa ku e konsekuensia ku e víktima a risibí leshonnan serio.

Dia 4 di yüli 2021, Lopez ta keda akusá di a bai ku 4 kadena, 750 florin, un telefòn, un tas di lomba hel ku kontenido ku ta pertenesé na e víktima di fam Hellmund. El a hasi esaki dor di usa violensia i menasa. Segun e denunsia, Lopez a mustra e víktima un machete i a dal e kuné riba su skouder.

Despues el a pon’é na su garganta i a keda prek e ku e machete. Tambe el a pone e víktima su kabes mei mei di un krùk di bar i despues push’e lag’e kai riba su kara. Durante tratamentu di su kaso, e víktima di fam Martina (ku e akusado a dal ku outo), a presentá den sala. Segun e víktima el a bin pa e wak ken e akusado ta, paso el a dal e ku outo pòrnada.

Martina a bisa ku  e dia ei e tabata kanando i e outo a sali ku velosidat haltu fo’i “verboden” i dal’e masha duru mes den su lomba bent’é abou. El a kai riba su kara i pèrdè gran parti di su djentenan.

Segun Martina su kara a keda basta destruí. Martina ta karpinté i normalmente e ta kana ku hopi sèn riba dje. Nèt e dia ei e no tabatin kasi nada di sèn. El a bisa mihó e akusado a par’e i pidié dun’é 25 florin i e lo a dun’é.

Segun e víktima fo’i e dia ei, e no ta trahando mas. Su kasá ta yora kasi tur dia pa loke a pasa kuné.

E akusado a bira wak e víktima i a bis’é ku e sa bon bon ku e no a dal e pòrnada!

Korte a bai di akuerdo pa posponé e kaso pa djaluna awor dia 7 di febrüari, kaminda lo trata e kaso huntu ku e ko akusado Phelipa.