WILLEMSTAD.- E afan di APC Bank ta pa trese tur desaroyo internashonal, ku ta tuma lugá den relashon entre bankonan i kliente, den komunidat di Kòrsou. Asina direktor di APC Bank Oswin Eleonora a bisa den entrevista ku EXTRA. E ta bisa ku APC Bank ta kere ku nos komunidat por adaptá hopi bon na desaroyonan internashonal, manera digitalisashon. Ku esaki APC Bank ke bira un ehèmpel den region. For algun tempu e ròl di bankonan a kambia, tin mas banko nobo rònt mundu ku ta funshoná otro ku bankonan tradishonal, entre otro riba tereno di digitalisashon. Tambe riba tereno di kontakto entre kliente i banko.
Pa APC Bank proseso di digitalisashon ta hopi importante. Pa tambe e banko ke krese. ‘Nos ambishon ta regional. Ku region mi no kier men Dutch Caribbean so. Regional kier men henter Karibe.’ Pa yega na esaki APC Bank ta kue e ehèmpel ku loke ta sosedé internashonalmente. ‘Nos ta usa teknologia probá, teknologianan stabil i sertifiká kaba. Pero nos ta adapt’é pa nos por usa esaki den nos komunidat i despues sigui us’é pa nos por krese den region.’ Eleonora ta splika ku APC Bank ‘definitivamente ta konsiente kiko ta pasando internashonal ku bankonan. Nos no ke invertí algu akinan ku ta eksistí na un otro pais kaba. Al kontrario, nos lo usa kos ku ta fit den mundu bankario internashonal kaba, pa Kòrsou. Pa asina komunidat di Kòrsou por sigui digitalisá. Asina nos por bolbe haña un puesto den merkado finansiero internashonal. Meskos ku ántes nos tabatin den trust por ehèmpel. Nos ta mira bankonan digital komo oportunidat.’
Manera ta konosí APC Bank N.V. a keda fundá na aprel 2020 dor di APC Pensioenfonds i e banko ta disponé di un lisensia bankario general. Dia 28 di mei 2020 tur e akshonnan di PSB Bank ku tabata pertenesé na Pais Kòrsou a keda bendé ku APC Bank N.V.. Awor APC Bank ta den proseso pa tuma over akshonnan di CHB (Centrale Hypotheekbank)
Eleonora: ‘Nos tin dos banko tradishonal ku ta forma parti di nos grupo. Pero e ta dos banko relativamente chikitu. Ku ta nifiká ku ainda nos tin e fleksibilidat pa hasi kambionan hopi lihé.’ Segun Eleonora kompania grandi no tin e fleksibilidat pa kambia direkshon di kompania. Bankonan chikitu relativamente fásil por kambia direkshon i inová.

PORTRET
...Direktor di APC Bank Oswin Eleonora den kombersashon ku Oscar van Dam di EXTRA...