WILLEMSTAD.- Algemeen Pensioenfonds Curacao (APC) no ta dispuesto pa karga e gastunan mará na e ‘reparatie pensioenlands verordening’, i asina fasilitá ku un grupo un tiki mas grandi lo ta interesá di bai ku retiro boluntario. Pero gobièrnu lo sigui den deliberashon sperando ku lo yega na un solushon. Esei EXTRA por a komprondé for di un anunsio interno ku gobièrnu emití resientemente pa su empleadonan.

Hopi ámtenar ta deseá na hasi uso di e asina yamá areglo di ‘Vervroegde Vrijwillige Uitstroom’ (VVU). Mirando ku e proseso ta tumando mas tempu ku loke a premirá, Human Resources Organisatie (HRO) di Ministerio di Gobernashon, Planifikashon i Servisio Públiko (BPD) ta splika e proseso i e estado aktual.

T’asina ku Gobièrnu di Kòrsou a instituí un Grupo di Trabou den kua ámtenarnan i representantenan di sindikatonan den CCvV a partisipá pa traha riba e VVU. A palabrá ku ta atendé e asuntu di ‘afbouwregeling’ i ‘reparatie pensioen landsverordening’ tambe.

E Grupo di Trabou aki a konkluí nan trabou pa loke ta trata VVU for di 7 di yüli último. Gobièrnu a pidi un reunion den e plataforma di CGOA pa firma e konvenio di VVU.

Sinembargo, mester konstatá ku despues di mas di 3 luna no a logra firma un konvenio al respekto ainda. Asina yega na un entendimentu den CGOA, por dal paso 6, esta konseho di Raad van Advies (RvA). RvA normalmente ta tuma entre 4 i 6 siman pa trata un petishon pa konseho.

For di inisio di e trayekto, Gobièrnu di Kòrsou a traha huntu ku Algemeen Pensioenfonds Curaçao (APC). APC a duna diferente splikashon na e Grupo di Trabou.

Sindikatonan den CCvV a pone komo kondishon ku pa por aprobá VVU, mester atendé 2 aspekto, esta 1) ‘afbouwregeling’ i 2) ‘reparatie pensioen landsverordening’.

Gobièrnu a bai di akuerdo ku e eksigensianan aki.

‘Reparatie Pensioen landsverordening’ ta enserá un reparashon di e lei aktual di penshun. Manera ta konosí, dia 1 di yanüari 2016 e lei di penshun nobo a drenta na vigor. Konforme e lei nobo aki, un persona ku ta deseá na baha promé ku 65 aña lo hasi un rekorte di 6% pa kada aña ku e bai ku penshun promé ku e edat di 65 aña.

Pues si e baha ku 64, e rekorte ta 6%; si e baha ku 63, ta 12%, i asina e ta kontinuá. Ku reparashon di e parti aki di e lei, lo por garantisá ku e penshun di e empleado públiko, despues di hasi rekorte di 6% pa kada aña, no ta risibí ménos na penshun kompará ku loke ku el a ‘bouw op’ te ku desèmber 2015. E punto aki no ta mará na VVU.

APC, sinembargo, no ke karga e gastunan mará na e “reparatie pensioenlands-verordening”. Pero Gobièrnu lo sigui den kombersashon ku nan riba e punto aki pa huntu yega na un solushon.