WILLEMSTAD.-Fondo di penshun general APC a anunsiá ku nan dia di pago ta 19 di yanüari próksimo. Penshonadonan rònt Kòrsou ta hopi pendiente di e momentu pa nan kobra e penshun di behes i AOV ku e kambionan ku a keda anunsiá pa gobièrnu resientemente. Manera ta konosí gobièrnu a anunsiá ku e AOV di 862 florin ta bira 1000 florin pa luna i e parti ku mas tantu penshonado ta pendiente di dje ta e lumpsum di 2500 florin ku ta repartí den dos parti.

Fondo di penshun APC ta informá penshonadonan ku ta risibí nan pago di AOV via APC, ku e penshonadonan aki lo risibí e AOV inkluso e oumento i tambe e lùmpsùm huntu ku e pago di yanüari. Manera indiká ariba e dia di pago ta 19 di yanüari.

APC ta splika ku SVB a anunsiá ku nan a sera un kombenio kaminda a yega na akuerdo pa hisa e montante di e AOV entrante promé di yanüari 2026 na Cg 1000 pa sierto grupo i tambe ku lo paga un lùmpsùm na sierto grupo di penshonado. APC ta referí spesífikamente na informenan di  SVB riba retnan sosial, kaminda ta duna mas splikashon kon ta yega na e montante pa kada penshonado.