WILLEMSTAD.- Aña pasá den luna di yüni Algemeen Pensioenfonds van Curaçao (APC) a inisiá ku konstrukshon di un edifisio di ofisina moderno na skina di Asteroïdenweg/Schottegatweg Oost. E konstrukshon a inisiá den 2019, pero manera ta konosí algun luna despues e kontratista ku tabata enkargá ku e konstrukshon a konfrontá problema serio i APC a opta pa no kontinuá ku e kontratista. E sirkunstansia aki i e pandemia di COVID-19 a sòru pa retraso grandi, pero no opstante APC a sigui ku preparashonnan pa reanudá e konstrukshon di e edifisio.

Entre tantu APC ta informá ku despues di basta preparashon a reanudá e konstrukshon di e edifisio di ofisina aki den luna òktober 2020. E konstrukshon ta planiá pa terminá na desèmber 2021.

Ta trata di un edifisio ku ta diseñá pa e ofisina di arkitekto Studio Acht Caribbean Architects B.V. E edifisio lo konsistí di dos ala, unu di dos piso i otro di 3. E dos alanan aki ta konektá ku otro via un parti sentral ku lo ta konstruí ful di glas. E edifisio lo tin un espasio total di 1.500 meter kuadrá. APC a firma for di inisio di aña un “huurintentieovereenkomst” ku un partido serio i sólido.

Ku e invershon aki APC ta fortalesé su entradanan for di invershonnan lokal i di e manera aki tambe fortalesé posishon finansiero di e fondo di penshun. Natural ku e invershon aki ta duna un empuhe na ekonomia di Kòrsou den e sirkunstansianan difísil ku nos ta pasando pa motibu di e pandemia di COVID.