WILLEMSTAD.-Un informe ofisial di e asosiashon mundial International Air Transport Association konosí komo IATA ta mustra ku for di kuminsamentu di e aña aki te awor 1.2 bion pasahero a biaha. Di e kantidat di 1.2 bion aki a detektá 44 kaso di hende ku sea ta probabel, òf kisas nan a keda kontagiá debí na un biahe ku avion òf tambe esnan ku a keda konfirmá ku nan ta infektá ku Corona Vírus. Pues ta 1 den 27 mion persona probablemente a keda infektá ku Covid-19 debí na biahe, asina e informe di IATA ta mustra.

E siman aki EXTRA a hiba un kombersashon ku Antonio Ribeiro direktor di Jet Air kende a mustra preokupashon pa e echo ku Kòrsou tin un bon profeshonal ku ta kuida nos pueblo di haña Covid, pero na mes momentu e ta sinti falta di esnan ku mester Sali na vanguardia di kuponan di trabou i desaroyo di ekonomia pa asina e gran mayoria di komunidat ku ta taha den empresanan priva òf ta rondia bida por sigui sobrebibí.

E relato di IATA ta hopi kla i e sifranan ta papia palabra kla. E direktor di Jet Air un bia mas ta lansa e pensamentu pa outoridatnan kuminsá pensa pa habri komunikashon aéreo ku paisnan den i latino Amérika, eksigí ku kada pasahero mester kumpli ku e PCR tèst meskos ku ta eksigí esei pa pasaheronan for di Ulanda. Den último dianan ta bisto ku e kantidat di hendenan infektá na Ulanda a subi 5000 kaso nobo tur dia, sinembargo ta keda habri pa risibí biaheronan for di Ulanda.

Karibe i Latino i Sur Amérika tin paisnan di kua e kantidat di kontagio ta muchu mas abou kompará ku Ulanda, ademas ta paisnan ku a demostrá ku Kòrsou ta sirbi komo bon sentro di kompra pa nan.

Gabinete Rhuggenaath ta bon na altura di e konsekuensianan di Covid pa Kòrsou, pues ta di spera ku sano huisio lo prevalesé pa skapa mas kupo di trabou i brinda mas sektor den komunidat pa gana nan pan di kada dia na un manera honrado.