WILLEMSTAD.- Kuerpo Polisial huntu ku Brantwer i Departamento di Seguridat ayera mainta a tene un kontrol na Kleine Werf kaminda Fundashon J.A.G. ta pendiente pa djasabra awor organisá e apertura di karnaval.
Fundashon J.A.G. tabatin plania pa hasi uso di dos stage pa e evento manera nan a promové, pero teniendo kuenta ku seguridat i posibel kalamidat, Fundashon J.A.G. a keda konsehá pa hasi uso di un stage so, esaki lo bira e stage grandi ku lo keda instalá riba Kleine Werf, Curaçao Carnival Village.
Den un komunikado emití, Fundashon J.A.G. ta informá ku nan lo bai konsentrá riba un área so, kaminda e 10 bandanan lokal lo bai presentá Tumba i Roadfire i 10 artista lokal i internashonal lo deleitá e hóbennan ku músika Urban. Tur kos lo keda meskos solamente lo konsentrá riba un área so.
Pa mañan djasabra e aktividat lo kuminsá pa 8’or di anochi, p’asina por deleitá tantu e públiko di Tumba komo esun di músika Urban.
Si ainda bo no tin bo karchi pa e magno evento aki di Apertura Karnaval 2018, buska di bo lihé paso no a sobra masha mas i pasa buska bo T-shirt na Sede di Fundashon J.A.G. na Teatro Luna Blou. Ban huntu ban selebrá Karnaval 2018......Pensa , Marcha i Gosa Bèrdè!.