WILLEMSTAD.- Awe mainta a tuma lugá den Atrium di Renaissance Hotel apertura ofishal di e konferensia Interparlamentario di Reino Ulandes (IPKO). Durante e IPKO delegashonnan di parlamento di Kòrsou, Aruba, St. Maarten i Ulanda lo deliberá entre 10 te ku 13 di yanüari.
Den delegashon di Kòrsou a falta tres persona: Norberto Ribiero (Kòrsou di Nos Tur), Gilmar ‘Pik’ Pisas (MFK) i Marilyn Moses (Movementu Progresivo). Nan no ta di akuerdo ku e manera ku presidente di Parlamento siman pasá a ninga oposishon durante proseso di huramentashon di 7 parlamentario nobo.
Parlamentario independiente Eduard Braam tabata presente durante apertura di IPKO si. Braam tambe ta di opinion ‘ku presidente di Parlamento siman pasá a trapa reglanan demokrátiko den Parlamento. Pero IPKO ta los di esei. P’esei mi ta presente aki.’