WILLEMSTAD.- Apertura di temporada di Karnaval 2019 su sekshon hubenil a tuma lugá ayera nochi ku un jump up saliendo for di Rooseveltweg na altura di Samira Shopping Center i a bai terminá riba e sitio di parker di Sambil.
Ounke e yamada pa gruponan hubenil partisipá no a risibí oido, e ambiente ku partisipashon di embahadornan di Karnaval, partisipantenan pa e diferente elekshonnan i e públiko kantu di kaya a pone a pèrkurá pa e konsepto di apertura hubenil a dal su promé paso.
Na yegada na Sambil e jump up a keda risibí pa un grupo di públiko ku huntu ku esnan ku a partisipá a sòru pa tabatin un kantidat aseptabel di públiko pa e evento.
Palabranan di entre otro representante di AGKK, FKBB, JAG i Minister di Kultura, Sra. Alcala Walle a forma parti dje parti ofisial. Pastor Curtis Meris a pèrkurá pa e invokashon. Rei di Tumba Hubenil, Gian van Eiker i Rei di Tumba Luwi Jano a presentá nan tumba sigui pa presentashon di Orkesta Vega. Riba foto algun momentu durante dje Jump Up.

LAGA UN KOMENTARIO

Please enter your comment!
Please enter your name here