WILLEMSTAD.- Algun dia atras EXTRA a informá tokante preparashonnan ku tabata hasiendo pa ku benta di vürwèrk e fin di aña aki.

Tambe nos a informá ku kisas kosnan lo por kambia di rumbo. Awor EXTRA a risibí informashon di su fuentenan ku tur kos ta indiká ku e aña aki lo tin skarsedat di vürwèrk. Esaki debí na problemanan ku tin na China.

Di 18 kònteiner ku mester a bini Kòrsou, diesseis (16) a logra keda kla di kual aktualmente ta 4 kònteiner so a logra yega Kòrsou. E problemanan ku tin na China tokante nan presidente a pone ku na e pais a sera e área kompletu kaminda tur klapchi ta almasená. Esei a pone ku e klapchinan no por a sali China. Awor probablemente algun lo por bai sali China pero esaki no ta sigur. Pues sea algun lo yega lat òf lo no logra yega mes. Loke si ta sigur ta ku e aña aki lo tin skarsedat di klapchi. Mañan lo bai tèst e klapchinan ku si a logra yega.

No tin lista e aña aki

Loke tambe ta un echo ta ku e aña aki lo no publiká ningun lista di show di vürwèrk. Esaki pa asina evitá aglomerashon di hende riba kaya i di mes manera stimulá komunidat pa keda kas si no tin nada di hasi riba kaya.