Tras di kada atleta tin un famia, un historia i hopi sakrifisio;  Izalda Chong mama di Tahith Chong

Promé ku e di dos wega di Kòrsou na Mundial di Futbòl 2026, nos a papia tambe ku mama di Tahith Chong, Izalda Chong.

Patras di kada atleta tin un famia, un historia i hopi sakrifisio. Awor ku Tahith ta representá Kòrsou riba esenario internashonal, nos a papia ku su mama pa sa un tiki mas tokante di Tahith, ku un dia a kuminsá su biahe manera kualkier otro yu den kas.

Un yu ku a trese pas i alegria
Ora Izalda a sali na estado ku Tahith, el a pensa ku e lo tabatin algun reto grandi den su kriansa. Hopi bia hende ta bisa ku yu hòmber por ta mas fèrfelu òf mas difísil pa guia. Pero segun Izalda, for di e promé dia ku nan a yega kas ku e beibi, tur kos a resultá diferente. “Hesus, e mucha a bin un pan di Dios,” Izalda ta konta ku un sonrisa grandi.

Segun e, Tahith tabata un mucha hopi trankil. E no tabata hasi hopi trabou, ni laga su mayornan pasa momentunan difísil manera hopi otro mucha por hasi. For di chikitu el a mustra un karakter pasífiko, respetuoso i yen di kariño. “Mi tabata kere ku lo mi mester ta hopi mas estrikto kuné, pero e mes tabata fasilitá e trabou,” Izalda ta bisa.

Un soño ku ta bira realidat
Pa hopi hende, Tahith Chong ta e hungadó ku ta drenta na kancha ku talento i eksperensia internashonal. Pa Izalda, semper lo e ta e yu trankil ku a bin na mundu manera un “pan di Dios”.

Miéntras Kòrsou ta sigui su lucha rumbo pa Mundial, historianan manera esaki ta laga nos mira e otro banda di futbòl: e famianan, e mayornan i e personanan ku a stima, guia i sostené e hungadónan durante nan bida.

I den kaso di Tahith Chong, tur kos a kuminsá ku mayornan ku a mira algu spesial den nan yu for di e promé dia.

E momento ku tur kos a kambia
Futbòl no tabata e promé pashon di Tahith. Segun Izalda, su tata, José, semper tabata stimul'é pa bai hunga riba vèlt. Pero den e promé añanan, Tahith no tabata mustra hopi interes.

“Su tata semper tabata bisa, ‘ban vèlt, ban hunga bala’, pero Tahith semper tabata ke keda serka mi,” Izalda ta konta ku un sonrisa.

Tur kos a kambia un dia, despues ku Tahith a wak un partido di Mundial na televishon. Aunke a pasa mas ku 20 aña kaba, Izalda ainda ta rekordá e momento ku klaridat. “Despues di e partido el a bisa: ‘Tata, mi ta kla pa bai hunga bala.’”

José a kere ku e tabata hasi un chiste. Pero Izalda a insistí ku nan mester tuma e mucha na serio. Poko tempu despues, José a kontaktá Etienne Sillie. “Dios bendishon'é,” Izalda ta bisa. “Te awe nos ta gradesido pa loke el a hasi.”

Tahith a keda inskribí den un tim i e resultado tabata inmediato. For di e promé entrenamentu, e entrenadónan a mira ku e mucha tabatin algu spesial.

“Ora nan a tèst é, e entrenadó a puntra si esaki tabata su promé biaha ta hunga futbòl, pasobra e tabata  hunga asina bon,” Izalda ta kordá.

For di e promé biaha ku Tahith a dal e bala, su talento a bira visibel. Ku solamente ocho aña, el a progresá tan lihé ku no a pasa hopi tempu promé ku el a kuminsá hunga ku muchanan vários aña mas grandi kuné.

E desishon ku a kambia bida
Un momento importante a yega ora José a bisa: “Nos mester bai un tiki mas leu ku Tahith.” Sin duda, Izalda a kontestá: “Ban.” Awe e ta mira bèk i ta bisa ku na e momento ei e no a para pensa demasiado. Si nan a laga miedu dominá nan desishon, probablemente nan lo a pèrdè un oportunidat úniko.

Durante un vakashon grandi na Hulanda, nan a tuma un paso ku lo kambia e futuro di Tahith. Na Hulanda, un mucha por presentá su mes na diferente klup pa un prueba sin mester permiso spesial. Nan promé parada tabata Ajax. Despues nan a bai Feyenoord.

“Ora nan a mira Tahith, nan a mustra interes mesora,” Izalda ta konta.

Representantenan di Feyenoord a puntra nan kon nan situashon tabata. Nan a splika ku nan tabata simplemente di vakashon, pero ku si e klup tabata kere den nan yu, nan lo buska un manera pa regla tur kos i regresá Hulanda.

Sakrifisio i perseveransia
E ruta no tabata fásil. Ora nan a regresá Hulanda, Feyenoord a pidi pa Tahith hasi un stazje nobo. Na e momento ei, komo mayor bo mester a pensa kon pa hasi esaki sin e yu ta na altura di e situashon, pa e yu no bira insigur òf stòp di presta. Tabata tin momentonan ku a trese frustrashon i insiguridat. Tahith a kuminsá entrená sin paña, i komo mucha e kosnan ei ta laga bo kuminsá pensa. E kier a sa dikon e so no tabatin unifòrm.

“Mi ta kòrdá te awe,” Izalda ta bisa. “Mi a bisa Tahith ku su paña a keda bestèl, pero ku e ta bin den boto i lo dura hopi tempu.” Tabata tin bia ku e famia mester a para i pensa: kiko nos ta hasi awor? Pero finalmente Feyenoord a duna Tahith e oportunidat. Un di su entrenadónan ainda ta rekord'é i ta konta kon e tabata mira e potensial den e yu pero tambe kon e yu tabata muri di friu. Un di e retonan ku Tahith sigur tabata tin ta e adaptashon na Hulanda, tur e periodonan. E friu tabata algu ku Tahith mester a siña manehá. “Pero apesar di tur kos, el a sigui lucha paso e tabata tin un meta i tabata stima futbòl.”

E mucha ku a madurá promé ku tempu
Ora nan a instalá nan bida entre Den Haag i Rotterdam, e famia a hasi otro sakrifisio grandi. Tahith mester a tuma trein regularmente pa bai skol, entrenamentu i bolbe kas su so. Pa un mama, esaki no tabata fásil. “Mi tabata yora di preokupashon,” Izalda ta atmití. “Bo ta puntra bo mes, kon bo ta laga un mucha di ocho aña bai riba trein su so.” Pero e eksperensia a yuda Tahith bira mas independiente i mas fuerte.

“El a madurá promé ku tempu,” Izalda ta bisa. “I awe mi ta gradesido na Feyenoord ku a kontribuí na e karakter ku Tahith tin.”

Orguyo di representá Kòrsou
Durante su tempu na Feyenoord, Tahith a sobresalí den kasi tur torneo ku el a partisipá. Hopi biaha el a sali ku premio individual i e prestashonnan ei a yama atenshon internashonal. Manchester United a sigui su desaroyo durante añanan. Pero segun regulashonnan di futbòl, nan mester a warda te ora el a kumpli 16 aña promé ku firm’é. Ora e momento a yega, e invitashon a bin. For di e dia ei, Inglatera a bira kas pa Tahith i su famia. Te awe, Izalda ta sigui e partidonan kaminda por. Tin bia e ta hasi biahenan di sinku ora solamente pa mira su yu hunga. “Tahith semper ta bisa: ‘Nos ta bai huntu.’” Pero apesar di tur su éksito internashonal, nada no por kompará ku e sintimentu di mira su yu bisti e kolónan di Kòrsou. “Ora e tabata hunga pa Hulanda, e tabata bon,” Izalda ta bisa. “Pero Hulanda no ta nos. Kòrsou ta di nos.” Pa Izalda, di tur e logronan ku futbòl a trese, tin un ku ta sobresalí riba tur otro. “Mi a bisa Tahith: di tur kos ku bo a logra den futbòl, esaki ta e kos ku mi ta mas orguyoso di dje. Bo ta representá bo pueblo. Bo ta mustra ku bo no a lubidá di unda bo a bin for di dje.”

Nunka lubidá bo rais
Apesar di añanan den eksterior, Tahith a mantené un konekshon fuerte ku su kultura i su idioma. “Bo ta un yu di Kòrsou i bo lo keda un yu di Kòrsou,” Izalda ta bisa. Den kas, papiamentu semper tabata e idioma prinsipal. E famia nunka no a laga e idioma ni e kultura bai. “Ora bo bai pafó, bo ta drenta un otro mundu. Pero papiamentu ta bo lenga. Nos no a lag’é lubidá esaki.” I awor, ora Tahith Chong ta prepará pa defendé Kòrsou den ruta pa Mundial, e historia no ta solamente tokante futbòl. Ta tokante famia, sakrifisio, perseveransia i e orguyo di semper kòrda unda bo a kuminsá.

Enseñansa promé ku tur kos
Un di e kosnan ku Izalda ta sinti mas fuerte tokante e sistema di futbòl profeshonal na Hulanda ta e balansa entre deporte i edukashon. “Ta e sistema ku Tahith a haña,” e ta splika. “I maske kuantu bo hasi, bo no por bring’é” “Edukashon ta importante, pero futbòl ta mas importante.”

Tahith a yega na un skol spesial, kaminda su orarionan tabata adaptá pa hóbennan ku tabata den sistema di futbòl profeshonal. Tur mainta, pa 10:30, bùs di Feyenoord tabata pasa buska nan pa bai entrenamentu.

No semper tabata fásil. Tin bia Tahith mester a falta klas pa torneo òf biahenan relashoná ku futbòl. Tin bia skol mester a duna uitstel pa tareanan i eksámennan. “Ami semper a bisa Tahith ku bo mester tin un plan,” Izalda ta konta. “Bo no por pone tur bo speransa riba futbòl so. Bo mester tin algu.”

Mas leu ku loke nan a soña
Ora Izalda mira bèk riba tur loke Tahith a logra, e no por skonde su orguyo. El a hunga den algun di e stadionnan mas grandi di mundu. El a eksperensiá kompetensianan manera Europe League i Champions League. Awor, e siguiente kapítulo ta Mundial. Pero pa Izalda, loke ta mas importante no ta e premionan ni e fama. “E eksperensianan ta spesial,” e ta bisa, “pero loke ta mas importante ta ku e ta felis i konforme ku loke Tahith a logra.” E mama ta bisa ku ora tur kos a kuminsá nan no a spera ku Tahith lo yega asina leu. Si bo lo a bisa nan ku esaki lo ta e futuro, probablemente nan no lo a kere. “El a yega hopi mas leu ku loke nos a spera.”

Un mensahe pa tur mayornan di Kòrsou
Izalda ta konkluí ku un mensahe pa tur mayor. “Kere den bo yunan.” Segun e, mayornan no mester laga niun hende definí e futuro di nan yu. Ni un entrenadó, ni un maestro, ni niun otro persona. “No laga niun hende bisa ku bo yu no por logra algu.”

E ta rekonosé ku tuma riesgonan no ta fásil. Tin miedu, tin insiguridat i tin momentonan kaminda bo no sa si bo ta hasi e desishon korekto. Pero sin e riesgonan ei, hopi soño no lo bira realidat. “Kòrsou tin hopi talento,” Izalda ta bisa. “Nos por yega hopi mas leu ku loke hopi hende ta pensa.” I maske un mucha no yega na e nivel mas haltu di deporte profeshonal, e eksperensia mes por transformá su bida. “Nan lo siña disiplina. Nan lo siña trabou duru. Nan lo siña ku mama i tata a hasi sakrifisio pa nan. Tur esaki tin balor.” I e mucha lo kòrda esaki pa semper den su kurason.

Algu grandi pa Kòrsou

Ora nos ta sigui nos ruta rumbo pa Mundial, historianan manera esaki ta mustra ku tras di kada hungadó tin un famia ku a kere, ku a lucha i ku no a stòp di soña. Tahith Chong ta un ehèmpel di loke por sosodé ora talento, trabou duru i apoyo di famia bin huntu. I si nos por kere e palabranan di mama Izalda, un kos ta sigur: Tin algu grandi na kaminda pa Kòrsou.