Defendé ekonomia meskos ku Gerstenbuth ta kuida no salú!

WILLEMSTAD.-Covid tei pa keda, esei por tende dr. Izzy Gerstenbluth i tur minister bisa konstantemente. Ta nifiká ku mester siña biba kuné! Covid a afektá tur sektor den nos komunidat, sinembargo por a skucha e siman aki ku apesar di e situashon serio i asta grave di kontagio na Ulanda, pa motibunan puramente pa mantené ekonomia biba a disidí ku ta permití pa turistanan for di Ulanda sigui bini Kòrsou. Na Ulanda e persona mester paga pa su PCR tèst i ku un deklarashon ku e ta negativo e por biaha pa Kòrsou. Esaki mester ta posibel pa otro áreanan manera paisnan den Karibe ku tin e potensial i ta konosí ku nan ta hasi hopi kompra na Kòrsou!

Sektor empresarial ta kontentu ku Kòrsou tin “the right man on the right place” pa tene nos poblashon salú pues ta spera ku lo por mira mesun kos den direkshon di ekonomia. Zona Franka sigur ta un di e sektornan hopi afektá pa Covid, pero nan ta mira e desaroyonan i ta spera ansioso riba desishonnan firme pa lanta ekonomia bèk.

Aviashon tambe ta víktima i den e kaso aki EXTRA a papia ku direktor di Jet Air, Antonio Ribeiro. Riba e pregunta di EXTRA si a trese preokupashon serka mandatarionan konserní el a bisa ku si. Na dos okashon Jet Air a reuní ku mandatarionan, CTB i tur stakeholder embolbí i semper ta tende na final ku mandatarionan ‘ta bai hasi todo posibel”.

Jet Air ta pará ketu miéntras ku tin interes den paisnan den Karibe pa biaha pa Kòrsou. Si tin hendenan ku ta dispuesto pa paga pa  PCR tèst, meskos ku ta sosodé na Ulanda, dikon no habri merkado di forma kontrolá i eksigí PCR tèst pa biaheronan for di paisnan kaminda e brote ta mas dominá? E kompanianan di aviashon por kumpli ku nan parti i asina poko poko ta enfrentá e enemigu komun ku ta Covid. Kòrsou a pèrkurá pa tin un infrastruktura i tambe logístika kompletu pa enfrentá Covid. Banda di CMC tin Seas tambe prepará.

E petishon na tur outoridat lokal ta pa apliká mesun sistema ku ta usa pa Oropa pa Karibe. Tin análisis kla kua ta e paisnan den Karibe ku ta mas konfiabel pa loke ta trata nan atendementu ku Covid. No keda pegá den análisis i bira parálisis! Laga e biahero hasi su PCR tèst i asina e por drenta Kòrsou limpi. Semper un tèst bálido mester keda e eksigensia prinsipal pasobra dr. Gerstenbluth a hasi tremendo trabou pa tene e poblashon aki sano. Ekonomia tambe mester di mesun atenshon i dedikashon. ‘It takes two to tango!”