WILLEMSTAD.- Awe den oranan di mainta a surgi un situashon di lamentá na momentu ku un pipa di awa a kibra den área di Waaigat, nèt banda di un ofisina di un abogado. Debí ku e pipa aki a kibra a pone ku hopi parti den Punda tabata sin awa pa algun ora. Pa banda di 11’or di mainta e personal di Aqualectra a logra drecha e pipa pa despues bai kuminsá spula e konekshon pa saka awa sushi etc. E kompania di utilidat a splika esaki pidiendo diskulpa pa e inkonbeniensia ounke ta algu ku por sosodé esta ku un pipa ta kibra. E kaso a kousa un konsternashon di otro mundu pasobra mesora tin esnan ku a kue e asuntu aki pa lanta bek e diskushon riba wc den sentro di siudat. E diskushon a bai asta mas leu spekulando ku ta masha hopi turista no por a hasi nan nesesidat i ku nan lo ta rabia riba Kòrsou ora nan bai nan pais bek. Punto ta ku e situashon a normalisá pasobra ta un pipa a kibra i nada otro. Mas detaye den edishon di EXTRA.