WILLEMSTAD - Téknikonan di Aqualectra a traha deligentemente pa restablesé e ret di koriente pa Kòrsou kompletu, despues di un 'blackout' ku a surgi ayera 3.20’or di atardi. E kousa di e 'blackout' lo mester keda investigá mas profundo ainda. Kontrali na loke a deklará na promé instante ku ta dor di e planta di CRU e ‘blackout’ a wòrdu okashoná, tin indikashon ku ta serka Aqualectra mes un planta a kai afó, kousando ku a kuminsá demandá mas kapasidat di CRU. Na momento ku CRU no por a suministrá esaki, e sistema di protekshon a kita e planta for di riba ret kousando un efekto ku a resultá den e ‘blackout’.

Aqualectra mesora a pone tur su rekursonan disponibel pa por restablesé koriente pa Kòrsou mas rápido ku ta posibel. Pa mas tardá 10'or di anochi tur bario tabatin koriente. Dos ‘blackout’ den un siman, no opstante ku e kousa no ta mesun kos, ta pone nos komunidat bou di hopi preshon.  Aqualectra ta kombibí ku komunidat i ta komprendé e molèster ku e ‘blackout’ a kousa.  P’esei Aqualetra ta pidi su sinsero diskulpa na komunidat. Awor ku a restablesé suministro di koriente, e énfasis ta riba garantisá suministro konfiabel manera ta e deber di Aqualectra. Na mes momentu ta hasiendo un investigashon profundo.

Aqualectra semper ta hasi un investigashon profundo na momentu ku un insidente grave manera un 'blackout' tuma lugá.  Ta hasi uso di e informashon optené for di e investigashon pa hasi ahustenan pa evitá ku algu asina por sosodé den futuro.  Esei ta loke lo tuma lugá tambe despues di e 'blackout' di ayera djaweps 10 di desèmber i tambe esun di di djaluna 7 desèmber último.

Aqualectra sa ku komunidat ta konta riba suministro stabil i duradero na un preis responsabel.  Aqualectra i su personal, lo sigui aun mas komprometé pa ofresé awa i koriente manera semper e kompania a sa di hasi.