WILLEMSTAD.- Kompania di awa i elektrisidat Aqualectra ta den ful preparashon pa pronto laga instalá un parke di djènereiter na Mundu Nobo p'asina garantisá ku tin sufisiente kapasidat di reserva. Ainda tempu ta kalor i e demanda pa koriente ta haltu. Mirando ku temporada di orkan ta dura te ku novèmber e plannan pa instalá èkstra kapasidat ta kontinuá. Na e momentonan aki Aqualectra ta drechando e infrastruktura riba e tereno na Mundu Nobo p’asina pronto por instalá e parke di djènereiter. Asina direktor di Aqualectra ta konfirmá pa EXTRA. Sinembargo despues ku a bira konosí ku Aqualectra a aserká e kompania Agrekko pa entregá mas kapasidat t'asina ku tin mas kompania ku a mustra interes den ofresé e kapasidat di emergensia. Den e kuadro aki Aqualectra a disidí di kana un proseso transparente i ta spera ku pa djárason awor un desishon final ta kai ta ku kua kompania Aqualectra ta firma kontrakt pa instalá e parke di djènereiter. Manera ta konosí e kompania ta spera ku pa otro aña e tin un planta di disel mas den operashon di forma ku e tin sufisiente kapasidat di reserva den kas.