WILLEMSTAD - Aqualectra huntu ku Wärtsilä a tuma un paso importante pa yega na un futuro energétiko sostenibel pa Kòrsou. Esaki, pa medio di e firmamentu di un akuerdo pa ehekutá un Sistema di Almasenahe di Energia pa medio di Bateria (Battery Energy Management System). Komo parti di Aqualectra su esfuersonan kontinuo pa alsa su servisio i sirbi komunidat di Kòrsou mihó, e akuerdo akí ta enfoká pa trese un revolushon kompleto den e maneho di energia na Kòrsou pa aña 2030. E Sistema di Almasenahe di Energia akí, lo sigurá distribushon di energia konfiabel, pagabel i sostenibel pa nos pais.

Implementashon di e Sistema di Almasenahe di Energia pa medio di Bateria, lo permití Kòrsou kolektá energia for di fuentenan renobabel manera bientu i energia solar i warda esakinan usando un sistema avansá di teknologia di bateria. E energia wardá, por keda liberá pa yuda mitigá interupshonnan den energia di bientu i garantisá mas stabilidat riba e ret (di koriente). E sistema di Almasenahe di Energia pa medio di Bateria lo ta asina efektivo ku koriente lo bai ménos riba nos isla i e lo optimalisá tambe nos uso di energia renobabel, kual na su turno ta kontribuí na un redukshon den emishon di gasnan den e atmósfera di tera.

Ehekushon di e sistema akí, ta trese tambe un sin fin di benefisionan ekonómiko pa nos pais; por ehèmpel esaki ta sòru pa un redukshon di kargonan na momentu di demanda máksimo na Kòrsou i tambe resibunan di energia mas abou tantu pa e konsumidó komo pa empresanan. Adishonal na e Sistema di Almasenahe di Energia pa medio di Bateria, Aqualectra a atkerí tambe un Sistema di Maneho di Energia pa mehorá aun mas e produkshon i distribushon di energia na Kòrsou.

Negosiashonnan pa yega na e Sistema di Almasenahe di Energia pa medio di Bateria akí a inisiá na yanüari di e aña akí na momentu ku maneho di Aqualectra a biaha pa ofisinanan di Wärtsilä na Finlandia ku un vishon, determinashon firme i ophetivonan kla pa por hasi e meta akí un realidat. Den ménos ku tres luna, e determinashon i persistensia di e tim di Aqualectra huntu ku e kolaborashon i entrega di e tim di Wärtsilä a duna su frutanan i e akuerdo a keda finalisá.

Pa duna aun mas realse na e impakto di e koperashon akí, Wärtsilä a invitá e tim di Aqualectra pa forma parti den e diskushonnan di pènel durante e konferensia di CARILEC 2024 pa Direktornan Ehekutivo i Liderazgo, kual ta tumá lugá di 19 pa 22 di Mei na Puerto Rico. E konferensia akí, ta uní vishonarionan, lidernan i tresedónan di kambio for di henter mundu pa marka e rumbo pa un futuro energétiko sostenibel i briante.

CARILEC, kual ta un asosiashon  karibense ku ta brinda solushon i servisionan di energia i utilidat, ta konta ku proveedornan di energia eléktriko i stakeholdernan operando den industria energétiko den henter region di Karibe pero tambe den Sentro i Sur Amérika i globalmente. CARILEC ta ofresé oportunidatnan kontinuo di informashon, treinen, kapasitashon i nètwèrk na su mas di 110 miembronan rònt mundu.

E kolaborashon entre Aqualectra i Wärtsilä ta suprayá e determinashon firme di Aqualectra pa alsa kalidat di bida pa e komunidat di Kòrsou pa medio di inovashon, determinashon i kolaborashon kontinuo. E akuerdo ku a keda firmá resientemente ta konstruí riba un base di konfiansa ku a kuminsá mas di 27 aña pasá entre e dos organisashonnan, na momentu ku Wärtsilä a konstruí plantanan di energia pa Aqualectra na aña 2015 i 2019. Anders Lindberg, Vise Presidente Ehekutivo di Energia di Wärtsilä a pone lus riba e kolaborashon bisando; “Nos tin konfiansa ku e koperashon akí lo hiba na gran éksito pa ámbos organisashon. Nos ta ansioso pa un kolaborashon fruktífero konstruí riba konfiansa mutuo.”

Despues di a firma e akuerdo pa e Sistema di Almasenahe di Energia pa medio di Bateria, Neysa Isenia, Aqualectra su direktor di Maneho i CFO tambe a enfatisá e sentimentu akí i e balor agregá den e vishon di Aqualectra pa alsa kalidat di bida pa e komunidat di Kòrsou bisando, “Nos afan ta, pa mantené un balansa ku ta sigurá ku tur loke nos hasi ta na benefisio di e komunidat ku nos ta sirbi.”