WILLEMSTAD.-E kompania di utilidat Aqualectra den un informe ta indiká ku e investigashon ku gerensia di e kompania a inisiá, basá riba e kasonan blackout ku a tuma lugá na kabamentu di 2020 i komienso di 2021, ku e investigashon ei ta kla. Pa loke ta trata e di dos investigashon kua ta esun ku Hunta di Komisario a inisiá riba petishon di minister enkargá ku Desaroyo Ekonómiko, Aqualectra ta bisa ku esei si no ta kla ainda.

E kompania ta mustra ku no por saka niun konklushon ni muchu ménos papia di medida disiplinario kontra di posibel sospechosonan. E kasonan di blackout tabata unu tras di otro ku sigur a kousa hopi molèster pa hinter komunidat. Segun Aqualectra, mester warda te na momentu ku e otro investigashon ta kla pa determiná eksaktamente kiko tabata e kousa real di e kasonan di blackout.