WILLEMSTAD -  Konforme pronóstiko di wer relashoná ku pasada di un Ola Tropikal na kosta nort di nos isla, bientu lo ta hopi abou, ku konsekuensia ku e produkshon di nos mulinanan di bientu lo ta mínimo.

E situashon aki di bientu ta bira krusial pa Aqualectra debí ku tin dos mashin di disel for di servisio, unu ku ta kibra “total loss”  i  un otro ku wardando riba piesa yega for di eksterior i lo ta kla pa start te na fin di sèptèmber 2017. Esaki ta hasi ku Aqualectra ta dependé muchu mas riba e mulinanan di bientu pa loke ta produkshon di koriente.

Aqualectra debí na esaki por konfrontá ku un falta di kapasidat di koriente entre djasabra 19 di ougùstùs i djadumingu 20 di ougùstùs. Prinsipalmente den  e anochi di djasabra entre 9 or pa 12 or anochi nos por surgi un falta di kapasidat di mas o ménos 2 pa 3 MW.

E demanda total pa isla di Kòrsou pa e orario aki lo ta di 118 MW miéntras ku Aqualectra lo por suministrá solamente 116 MW.

CRU ( BOO) den kaso ku ta nesesario  por koperá i oumentá su suministro na Aqualectra  di 2 MW pa 10 MW.

Despues di djadumingu 20 di ougùstùs e situashon di bientu ta bolbe subi i nos lo tin sufisiente kapasidat pa suministrá e demanda.  Pero nos tin ku tene kuenta ku pronóstiko di diferente sistemanan di wer ku por drenta  e area di Karibe den e próksimo dianan.

Aqualectra lo keda vigilá e situashon di wer i hasi tur su esfuerso pa aliviá e situashon ku por presentá i alabes ta hasi un apelashon na komunidat pa kaminda por usa ménos koriente posibel.