Areglo di Emergensia Banco Del Orinoco N.V. pronunsiá riba petishon di Banko Sentral

Willemstad/Philipsburg – Centrale Bank van Curaçao en Sint Maarten (CBCS), pa motibu di e defisiensianan na Banco Del Orinoco N.V., a mira e nesesidat pa pidi Korte den Promé Instansia na Kòrsou pa pronunsiá e areglo di emergensia pa ku Banco Del Orinoco. E petishon ta hasí na interes di deposantenan i otro kreditornan di Banco Del Orinoco.
Korte den Promé Instansia na Kòrsou a pronunsiá e areglo di emergensia 5 di sèptèmber 2019 pa ku Banco Del Orinoco. Pronunsiamentu di e areglo di emergensia tin komo resultado ku no por obligá Banco Del Orinoco pa kumpli ku su debenan. E areglo ta suspendé ehekushonnan andando i ta kaduká embargonan. Pa informá públiko, deposantenan i sobra kreditornan, CBCS lo tene un konferensia di prensa riba djaweps 5 di sèptèmber 2019 pa 15.30 or.
CBCS ta ehersé supervishon riba sektor finansiero di Kòrsou i Sint Maarten. E supervishon di CBCS ta dirigí riba interes di kreditornan òf futuro kreditornan di institutonan bou di supervishon. CBCS ta pèrkurá pa institutonan bou di supervishon atendé na un manera responsabel ku medionan konfiá na nan i ku nan ta tene na mes na lei i regulashon aplikabel.

SHARE

LEAVE A REPLY