WILLEMSTAD.-Minister di desaroyo ekonómiko Steven Martina huntu ku direktor di desaroyo ekonómiko Zulaika Mook a presentá un areglo nobo ku gobièrnu di Kòrsou a introdusí. Ta trata di un areglo pa yuda empresarionan ku tin trahadó den servisio.

Minister Martina a splika ku dia ku Covid a dal aden gobièrnu di Kòrsou a bini ku areglo NOW pa yuda empresanan. Ta brinda supsidio di salario te 60% na empresanan, e empresa mes tin ku kontribuí ku 20% di manera ku e trahadó ta mantené su trabou kobrando 80% di salario. Otro areglo ta e TBZO, pa empresarionan individual. E empresarionan individual ta bini na remarke pa haña entre 1000 – 1350 florin pa luna. Asina ta sostené e empresario pa e efektonan di  e pandemia.

Danki na e kombenio ku Ulanda gobièrnu di Kòrsou ta den posibilidat di por ofresé un areglo nobo, esei ta unu pa kubri e gastunan operashonal fiho. Empresanan por apliká pa  bini na remarke. Kompanianan ku kalifiká pa sierto parti di nan gastunan operashonal lo keda supsidiá ku e meta pa yuda empresanan tene kabes riba awa.

Gastunan fiho ta hur, hipotek, gastu di finansiamentu i lease. Gobièrnu a konsiente ku despues di 9 luna empresanan ta hana nan mes den pèrta. Esnan ku ta bini na remarke ta na promé lugá empresanan ku tin trahadó, esnan ku ta inskribí na SVB i Ontvanger promé ku febrüari 2020 i ku por demostrá ku nan a sufri pèrdida di mas ku 25%. Mas detaye den edishon di EXTRA.