WILLEMSTAD. - Dia 28 di desèmber Polis a arestá un hòmber kurasoleño Curtly B. di 32 aña di edat, ku tabata keda buská pa su embolbimentu den e kaso kaminda ku 2 persona a pèrdè nan bida i 7 herido durante un tiroteo na aeropuerto Hato.

Polisnan a para un outo BMW moviendo riba outopista den e siudat Zoeterwoude-Rijndijk. Na momento di kontròl a resultá di ta un persona ku hustisia di Kòrsou ta buskando ya pa dos aña kaba.

E persona aki su nòmber tabata figurá riba e lista internashonal komo sospechoso. A detené i a tuma e outo den beslag. Hustisia ta buskando e hòmber Curtly B. sospechá di asesinato i soborno.

Ainda pa hopi hende ta fresku den nan memoria kon dia 16 di yüli 2014 tabatin un drama ku a tuma lugá na aeropuerto Hato, kaminda ku algun persona armá a yega na porta di yegada i a bai pa likidá un persona. Esaki  a resultá den un tiroteo formal, kaminda ku dos persona a pèrdè nan bida i 7 persona seriamente heridá.

Investigashon a pone ku tur e sospechosonan a keda kondená na kastigu di prizòn severo i for di e tempu ei tabatin mester di un persona mas.

E persona aki ku tur probabilidat lo keda trasladá pa Kòrsou, despues di a keda arestá na Ulanda dia 28 di desèmber tras di lomba.