Ta kasi 1 aña pasa ku Morwenna Minguel a funda Olympia Curaçao Archery Association (OCAA). Ta trata di e di dos skol di arkeria (tira ku arka) na Kòrsou. E skol aki ta duna lèsnan tantu den forma di rekreashon komo den kompetensia i ta kuminsá for di 10 aña bai ariba.

Nos di Djasabra a bishitá Olympia Curaçao Archery Association kaminda nos tambe por a hasi prueba di kiko ta nifiká tira ku arka òf tira ku bog, manera por yam’é.

Morwenna a konta ku e skol a keda funda òktober 2020, kasi un aña pasá. Einan nan ta práktika e deporte di arkeria ku ta tiramentu di arko i fecha. Ta trata aki di un deporte ku ta asta esun mama den weganan olímpiko. Durante di e promé olimpiada tabatin arkeria ku a partisipá.

 

Konsientisando…

Na Kòrsou arkeria ta birando konosí. Nan ta kreando e konsientisashon serka hende di Kòrsou ku tin un deporte mas aparte di esnan tradishonal manera baseball, futbòl, básketbòl, sòftbòl. Ta un deporte ku no por praktiká na nivel rekreashonal, manera hopi hende ta gusta hasié pero e por sosodé na nivel kompetitivo pa asina tòg kompetí den eksterior.

Morwenna mes ta den arkeria debí na un interes ku a kuminsá serka dje for di chikí. El a menshoná weganan di Nintendo Dragon field 2 i esei tabatin archery i semper el a skohe pa e por hunga. No tabata e deporte aki na Kòrsou e tempu ei. Pero 4 aña pasá el a sera konosí ku e deporte ku ta keda duná na Curaçao Archery School kaminda el a kuminsá praktik’é. E tabata ‘love at first sight’ i awe e tin su mes skol di arkeria. E propósito ta pa lanta un federashon di e deporte aki. E propósito di fundashon di e skol Olympia ta pa nan por yega na kompetensianan mundial.

Un aña…

E skol ta bai kumpli un aña i nan ta bezig ta trein na distansianan di 16 pa 18 meter. Tin un arkero aktualmente ku ta tira 60 meter i el a kaba di kompetí resientemente na Merka kaminda el a kualifiká i a yega ronda eliminatorio. Ta praktiká e deporte aki di forma basta serio na nivel tòp. I esaki no ta promé bes ku e arkero aki ta kompetí internashonal. El a yega di kompetí na Trinidad kaminda el a gana medaya di plata. Distansia olímpiko ta 70 meter i hende hòmber ta tira 90 meter. “Nos ta yegando einan” Morewenna a bisa.

 

Discover Archery…

Aktualmente e skol ta trein den kurá di e skol ku tin den kurá di Goisco. Morwenna a bisa ku nan ta basta drùk den siman. Nan ta duna lès di 6 pa 9 or di anochi pa diferente grupo. Djasabra e lès ta pa hóbennan i djadumingu si no tin lès pa esnan ku ta kuminsá, ta organisá Discover Archery ku ta pa e hendenan por sera konosí ku e deporte di arkeria. I den hopi kaso esnan ku ta bai purba, ta bolbe bai un di dos bia, tin bia asta 4 pa 5 bia pasobra nan ta hasié pa dibershon. I tin hende ku ta bira miembro i registrá pa e lèsnan di arkeria. Ora di e lèsnan ta pasa dor di e pasonan di e téknikanan kon pa usa un bog pa tira un flecha

 

Importante pa tene kuenta…

 Morwenna a bisa ku ta importante pa esun ku ta bai purba pa tene kuenta pa e pianan ta kubrí, esta semper sòru pa tin kèts na pia òf sapatu será. Esnan kabei largu i lòs tin bia tin basta bientu i preferibel pa wanta esaki na un pasobra kisas nèt bo ta bai tira i bientu ta pasa i kabei ta drenta den e string i ta bai ku e flecha. Paña no muchu lòs na kurpa, bisti deportivo i ser habrí pa pasa dushi i siña. E lèsnan pa deskubrí arkeria ta dia 1 ora. Na momentu ku ta bai kuminsá e lèsnan, tin di sigui vários instrukshon. Entre otro ta determiná e wowo dominante. Ta duna splikashon di seguridat i kon pa tira un bog. E sobrá di tempu e bishitante ta tira algun flecha bou di guia. I dependé kon e kosnan bai, nan ta hasi un spèl na final.

 

Pasenshi…

Masha importante pa relax i e deporte ta sòru pa subi e hende su pasenshi. Mester tin hopi pasenshi pa tira i logra e meta. Den luna di òktober i novèmber nan lo organisá un ‘Meet and Greet’ riba un djadumingu kaminda pa pueblo di Kòrsou por bai sera konosí ku e deporte, papia ku algun arkero i sa mas di e deporte. Olympia tin su Facebook, su e-mail ta [email protected], su wèpsait ta
https://www.olympiaarchery.com/

i telefòn ta 697-1131.

 

 

 

 

 

 

LAGA UN KOMENTARIO

Please enter your comment!
Please enter your name here