WILLEMSTAD.-Arte di Palabra ta felisitá MCB ku nan di 105 aniversario.

Bintidos aña pasá, na aña 2000, a nase e inisiativa pa Arte di Palabra, kompetensia di poesia i kuenta kòrtiku na papiamentu.

Pa selebrá e echo ku papiamentu a bai skol avansá komo materia obligatorio na Kòrsou, dosentenan di papiamentu a uni pa selebrá e echo históriko akí. Organisashon di e evento tabata simpel, ku un kantidat di hóben ku tabata warda pa eksponé nan talento na nan idioma materno, papiamentu, partisipante tabata garantisá!

Un detaye importante mester a solushoná: un donashon finansiero pa garantisá éksito di e inisiativa akí.

Ku un karta pa “nos” banko amigu, MCB, e promé donashon tabata reglá. Durante 23 aña e kompetensia a sigui krese ku kompetensia di haiku i rèp pa tur klas di skol avansá vsbo, havo, vwo i sbo. El a span su ala tambe na Aruba i na Boneiru. Ku tur esaki, MCB a keda nifiká un pilá konstante den e éksito di e festival literario, no solamente riba tereno finansiero, pero tambe ku  konseho balioso i presensia di representante di MCB na kompetensianan na Kòrsou, Aruba i Boneiru. Riba e portrèt, por mira direktor di Banco Maduro sr. Chicu Capriles i su señora esposa durante Kosecha Kultural organisá pa PBCCG na Landhuis Bloemhof na 2017.

Di parti di henter famia di Arte di Palabra ke felisitá Banco Maduro & Curiël ku e di 105 aniversario. Danki na e apoyo finansiero i konseho balioso na e festival literario na papiamentu akí. Un danki spesial ta bai na señora Migdarys Mercera pa su amor i dedikashon. Nos ta spera di por sigui konta ku nos Banko Amigu pa hopi aña mas.