WILLEMSTAD.- Abogadonan mr Kid  Martina i mr Snel  a haña rason serka hues i pone ku e akusado  a keda apsolvé di violashon.

Ta trata di e kaso di kual un artista kantante kolombiano   ta keda akusá di a violá un dama kamarera di Papagayo Resort.

Pa ku esaki Ministerio Públiko a akusá e hòmber W.A. (41) ku a bin Kòrsou pa kanta (dia di mama 11 di mei último), di a violá e dama kamarera.

Hues den su veredikto a duna di konosé ku e deklarashon di e dama ku e akusado ta para kontra otro.

E dama a deklará ku e akusado a viol’é, miéntras e akusado a bisa ku nan a tene relashon seksual boluntariamente.

Hues mas aleu a bisa den su veredikto ku e dama su deklarashonnan tabata inkonsistente, miéntras ku e akusado tabata splika kada bes e mesun vershon.

Abogadonan di e akusado a splika korte ku e dama a deklará e promé bia ku e akusado a tene su man drechi i bent’é riba kama, miéntras ku den e di dos deklarashon e dama ta bisa ku e akusado a push’é di kual tur dos a kai pareu riba e kama.

Esaki sigur ta hasi e deklarashon inkonfiabel.

Segun e dama, e akusado a push’é  den kamber di e resort, bent’é riba kama i viol’é.

E akusado ta para riba ku niun momento so, no tabatin akto di violashon i ta keda straño ku e dama a hasi denunsia.

Segun e akusado, e dia en kuestion, el a topa e dama riba pasio pa bai kamber. Fo’i ora e dama a mir’é e dama a keda smail kuné.

Despues el a bai den kamber i kier a traha un tiki kòfi, pero no tabata por a traha ku e mashin di traha kòfi. El a bai pafó i pidi e dama pa yud’é ku esaki.

Segun e akusado, nan a kana bai kamber huntu i  na kaminda e  dama a puntr’e si ta di Colombia e ta, pa motibu ku e ke bai Colombia pa asina haña yudansa ku su malesa di “schildklier”, pa motibu ku e tin problema ku esaki i ku p’esei e ta keda demasiado flaku.

El a sigui relatá ku e  dama a bisa ku e no ta sintié bon asin’ei, pa motibu ku e ta keda deskriminá pa hopi hende.

Segun e akusado mas aleu, e dama a konta kon destruí su bida ta pa motibu di e malesa ei  i kon malu su kasá ta trat’é.

El a konta ku ora e dama tabata trahando kòfi pe, el a para band’i dje.

Ora e dama a kaba el a hisa kara i nan a sunchi otro sin sa. Ei nan a kai riba kama i kuminda sunchi mas apashoná.

Segun e akusado, e dama mes tabata ke tene relashon kuné. El a splika ku el a sinti ku e dama su kurpa tabata pidi pashon i e na su turno a kere ku ta un fabor lo e tabata hasi e dama, mirando ku e dama mes a kont’é ku su kasá no ta dun’é atenshon nesesario.

Hues a relatá ku e dama a deklará na polis ku e akusado a kue e dama ranka i ku su otro man a kita su panty.

E akusado na su turno a splika ku esaki ta imposibel pa motibu ku e sistema ku e dama a splika no por ta kuadra.

Hues a sigui duna di konos’é ku  koleganan di e dama a deklará di a haña e dama bentá den huki di e pasionan di e hotèl sinta awa na wowo i tur troumatisá, despues di e suseso.

Segun hues na polis e akusado mes a deklará ku el a sedusí e dama ku palabra nan bunita i a tene relashon kuné.

Mas aleu hues a sigui duna di konos’é ku e a hasi un tèst di DNA ku e dama, di kual en bèrdat a haña spèrma di e akusado, den  e dama su parti íntimo.