Rinella Alfonso, hóben yu di Kòrsou ta un di e 3 artistanan ku a gana premio di reino pa arte liber  (Vrije schilderkunst 2021”. Na yüli último Rei Willem Alexander a hasi entrega di  Koninklijke Prijs voor Vrije Schilderkunst 2021 na Rinella Alfonso, Hend Samir i Philipp Gulfer. E tres hóbennan a risibí nan premio i tambe un suma di 9 mil euro. Ku entrega di e premio aki tambe rei a hasi apertura di e eksposishon  di trabounan di e ganadónan i tambe e nominadonan den galeria di palasio. E aña aki tabatin no ménos ku 500 artista ku a kompetí pa e premio máksimo i den e kaso aki un di e tres ganadónan tabata nos yu di Kòrsou Rinella Alfonso. I Djasabra tabatin e honor di papia ku Rinella ku a konta nos lo siguiente;

For di chikí

Rinella a bai den direkshon di arte manera el a splika, tur kos a pasa di forma natural. Tur mucha ta kuminsá pinta kas, ku nubia, solo i e no a stòp for di e tempu ei. E tabata gusta pinta hopi ‘cartoons’, ku e tabata wak komo mucha. Despues el a kuminsá purba fèrf i esei di paisahenan den naturalesa i hende. Un bia el a bai tayer di trabou na kas di Kultura di pintamentu i un persona einan a menshoná Instituto Buena Bista, kaminda ta haña tur tipo di arte i kaminda ta prepará e persona pa bai akademia di arte den eksterior. Promé esei no tabata posibel i tabata simplemente un hòbi, pero ku IBB el a ripara ku ta posibel pa e por bai i profeshonalisá su mes den arte i traha karera den arte. Esei Rinella a hasi tambe i te ainda e ta bayendo den bon direkshon.

 

Krese den IBB

Na Instituto Buena Bista el a keda 2 aña, i a haña tur tipo di arte; pinta, eskultura, filma, fotografia, a traha ku artistanan ku ta hasi residensia, a traha den proyekto i asina el a yega na un portafolio di kasi 100 trabou. Ku esei a bai Hulanda i apliká na diferente akademia di arte, Rinella a bai e akademia di Arte na Den Haag (Koninklijke academie voor beeldendekunst). Einan tabatin un departamentu spesial pa pinta/schilder i esei Rinella a skohe pe. Despues di a hasi tur e práktikanan i a purba tur, el a skohe pa ‘schilder’ ku ta loke e ta hasi for di chikí. Pero promé el a buska tur posibilidat ku e pintamentu.

 

Pinta

Tin hende ta skohe pa pinta mas tantu panorama pero Rinella a hasi diferente. Su obranan ta pinturanan fantasia. Komo e ta purba di ta algu ku no semper por rekonosé, e ta komprondé e material di fèrf i tur loke por hasi kuné i asina laga su sentimentu kana i no loke ta rekonosé pa por konta un historia. Ta trata di téknikanan di tur loke ku por hasi ku fèrf i laga kosnan komuniká konfortabel ku otro.

 

Programa post akadémiko

Rinella a terminá akademia di arte na Den Haag 2 aña pasa i el a apliká pa un ‘post academic programme’ ku ta konosí rònt mundu i nan ta tuma hóbennan pa 2 aña kaminda nan ta haña artistanan ku ta bin guianan i e hóben ta haña un studio grandi i bunita den sentral di Amsterdam, nan mes ta regla kaminda di biba pa e hóben. Na desèmber próksimo su 2 aña ta terminá i despues Rinella lo bai ta un tiki ménos konfortabel i e tin di regla su mes studio i kas. El a haña hopi oportunidat pa shou su obranan den festivalnan di arte rònt mundu. E tin un awor aki na Merka i si e shounan sigui bin i bo ta bende bo por biba di dje sin problema.

 

Sobrebibí

Rinella a sigui konta nos ku tur mama no ke pa nan yu hasi arte pasobra no ke pa nan hasi Odd jobs, gewon pa sobrebibí, sin ta sigur ku nan lo por tin éksito. Pero na Hulanda tin hopi sèn ta bai pa fondonan di kultura i arte. Tin supsidionan i hopi mas. I no ta bai pa bende e arte pa biba pero e artista por haña supsidio tambe i no ta presis buska Odd jobs pa sobrebibí.

 

Konseho pa mayor

Teniendo na kuenta kiko mayornan ta pensa di arte komo estudio pa nan yu, Rinella su konseho ta pa duna e hóben un chèns. E hende tin di hasi loke e ta sinti ta bon pe. Esei ta algu masha lógiko mes. Den su kaso e tabatin basta diskushon ku su mama pa e purba tòg. I p’esei na mayornan laga e hóben purba tòg pa wak. E ta algu ku e mes a hasi te el a yega na e punto di gana premio na Hulanda. I komo artista ku a gana premio Rinella ta sintié hopi bon. Di tur e artistanan ku a partisipá, ta artistanan ku e ta respetá nan trabou i den nan el a gana e premio.

 

Atmirá

Pa loke ta e artista ku Rinella ta atmirá komo ehèmpel den su kaso ta Tirso Martha i David Bade. Nan dos semper tabata su ehèmpel i nan ta e fundadónan di IBB. I Rinella ke bira meskos ku nan. Nan ta shou hopi, nan ta yuda hopi hóben na Kòrsou pa kere den nan mes pa bira artista.

Mas oportunidat

Ku esaki Rinella ke pone énfasis ku un hóben ku sigui su estudio den arte por biba di dje. Na Kòrsou e ta haña ku por dediká mas na artistanan hóben mas importante Lo mester tuma un rísiko ku nan pa asina por yega e kaminda ku no mester bai Hulanda pa sobrebibí. Mester habri oportunidat pa hóbennan artista traha nan trabou na Kòrsou. E ta spera esei lo por bin ku tempu. Tambe e ta kere ku mester habri mas oportunidat pa hóbennan studia arte na Kòrsou. Mester tin mas premio, mas shou pa artistanan i duna hende yòn un chèns. Hopi artista konosí na Kòrsou ya ta hende grandi. Tambe kere mas den artistanan di nos mes tera.

 

Mas di 500 obra

Rinella a bisa ku el a hasi masha hopi obra di arte. E por kalkulá un 500 obra ku el a traha kaba. Ta for di chikí te awe. El a bisa ku ta tòg basta fásil pa e laga su obranan bai. El a bisa Djasabra ku tin bia ora e kaba ku un trabou e ta haña ku esaki tin di bai pa asina e sentimentu den studio por keda fresku pa kosnan nobo por bin.

 

No ta bida fásil

Na ‘Atalier’ e tin un presentashon final kaminda e ta shou algun trabou pa asina klousura e 2 aña. Esei ta na òktober i na desèmber e tin Art Basel ku ta un festival di arte na Miami. Mas aleu e tin otro shou na mas museo. De henter su karera, esaki tabata e aña di un lokura total di trabou. E ta spera ku un dia e lo por haña un invitashon pa eksponé su obranan aki na Kòrsou tambe. Arte no ta un bida fásil, pasobra ta tur dia e ta den studio ta traha, hasi investigashon, tèst. No ta un bida fásil. Konosiendo hopi hende di IBB, artistanan di Kòrsou semper tin algu spesial ku no ta mira niun kaminda. “Nan tin un talento èkstra i p’esei tur mama kere den bosnan yu pasobra nos tur tin algu spesial”.

Un sentimentu úniko

Rinella a deskribí e momentu ku a yama su nòmber pa subi i para banda di rei Willem Alexander. “segun mi, mi no tabata den mi kurpa. Mi mester a sali for di mi kurpa un ratu, Prinses Beatrix tambe tabata einan ta bati man. Ora mi a subi mi kier a baha mas lihé posibel pasobra mi no ta hende di e kosnan ei. Mi ta kontentu si”. E hóben aki a konta nos di Djasabra.

LAGA UN KOMENTARIO

Please enter your comment!
Please enter your name here